कार्यक्रमके अध्यक्षता बेलौरी नगरपालिकाक नगर उपप्रमुख तथा न्यायिक समितिक संयोजक जोगराम चौधरी कर्ल रहैं। कार्यक्रमम न्यायिक समितिक सदस्यन शिवराज राना ओ आरती चौधरीके फेन सहभागिता रहै।
कार्यक्रमके स्वागत मन्तव्य न्यायिक समितिक सदस्य आरती कुमारी चौधरी ढर्ले रहैं कलेसे कार्यक्रमक विषयवस्तुके बारेम सदस्य शिवराज राना प्रस्ट पर्ल रहैं।
कार्यक्रममे बोल्टी नगर उपप्रमुख चौधरी गाउँ–ठाउँमे हुइना विवादहन अदालत वा और निकायमे पुर्याएसे आगे आपसी छलफल, समझदारी ओ सहमतिक माध्यमसे समाधान कर्नाम मेलमिलापकर्तानके महत्वपूर्ण भूमिका रहना बतैल उहाँ कल"वडामे हुइना सामान्य विवादहन वडाम छलफल ओ मेलमिलापक माध्यमसे समाधान कर्ना हमार उद्देश्य हो। एसेक नागरिकनके समय ओ खर्च दुइटै बचत हुइठ कलेसे आपसी सम्बन्ध फेन बिग्रसे जोगाए सेक्जाइथ।"
उहाँ मेलमिलापकर्तानहन कहुक फेन प्रभावमे नपरिके निष्पक्ष ओ तटस्थ होके अपन जिम्मेवारी पुरा कर्नाम जोड डेलै। उहाँ मेलमिलापकर्तानहन अपन जिम्मेवारीके पद निसेंक सेवाक रूपमे लेके काम करेक लाग आग्रह कर्ल रलह।
नगरपालिका मेलमिलापकर्ताक रूपमे सूचीकृत हुइ खोज्ना मनैनके लाग १५ डिनक सूचना जारी करके दरखास्त आह्वान कर्ल रहै। उह प्रक्रियासे विभिन्न वडाक लाग मेलमिलापकर्ता सूचीकृत करल हो। वडा नम्बर १ से कलसे कहुक फेन निवेदन नआएल नगर उपप्रमुख चौधरी जानकारी डेलै। उहाँके अनुसार और वडासे परल आवेदन आधारमे प्रक्रिया पुरा करके ३४ जेहन मेलमिलापकर्ता सूचीकृत करल हो।
कार्यक्रममे सूचीकृत मेलमिलापकर्तानहन न्यायिक समितिक संयोजक तथा नगर उपप्रमुख चौधरी पद ओ जिम्मेवारीक सपथ ग्रहण कर्ल रहैं। स्थानीय तहमे न्यायिक समितिमार्फत विवाद समाधान कर्ना क्रममे मेलमिलाप प्रक्रियाहन प्रभावकारी बनाएक लाग नगरपालिका मेलमिलापकर्तानहन वडागत जिम्मेवारी डिहल हो। नगरपालिका वडास्तरम विवाद समाधानक वातावरण निर्माण करके नागरिकहन सहज, सरल ओ झट्त न्यायके अनुभूति करैना लक्ष्य लेहल बतैल बाट।
न्यायिक समितिक उजुरी प्रशासक विनोद चौधरी प्राविधिक विषयअन्तर्गत समितिमे उजुरी दर्ता हुइलसे लेके मेलमिलाप केन्द्र सम्म पठाएबेला अपनाए पर्ना विधि तरिका, मेलमिलापकर्ता मेलमिलाप सत्रम ध्यान डिहे पर्ना विषयवस्तु, ओ मेलमिलापकर्ता छनोट प्रकृया लगायतका विषयमे सहभागी मेलमिलापकर्तानहन जानकारी डिहल रहैं।
