६  २०८३ आईतबार | 22 Nov 2026 Sun

कञ्चनपुर : आइना चुनावसंगै एमाले नेता भट्टके राजनीतिक भूमिकाबारे चासो

आइना चुनावसंगै एमाले नेता भट्टके राजनीतिक भूमिकाबारे चासो

  • दिनेश चौधरी
  • २९  २०८३ आईतबार (१ हप्ता अघि)
  • पाठक संख्या ४१७
  • आइना स्थानीय तह ओ प्रदेशसभा चुनावके राजनीतिक सरगर्मी बह्रती जाइबेर नेकपा एमाले कञ्चनपुरके जिल्ला सचिव पल्लवराज भट्टके आउइना दिनमे राजनीतिक भूमिका रही कहिके जिल्लाके राजनीतिक वृत्तमे चर्चा होए लागल बा।

    ​लम्बा समयसे पार्टी संगठन, पत्रकारिता, मानवअधिकार ओ सीमा सरोकारके विषयमे सक्रिय रहती आइल भट्टहे आउइना दिनमे कौन तहके जिम्मेवारी देहे कहिके चासो बह्रल हो।

    ​विद्यार्थी राजनीतिसे अपन राजनीतिक यात्रा सुरु करल भट्ट २०४७ सालसे अनेरास्ववियुमे आवद्ध होके सक्रिय राजनीतिमे प्रवेश करल रहैं।

    ​२०५३ सालसे कञ्चनपुर निर्वाचन क्षेत्र नम्बर १ हे अपन राजनीतिक कार्यक्षेत्र बनाइती आइल उहाँ पार्टीके विभिन्न कमिटी तथा जनवर्गीय संगठनमे रहिके काम कर सेकल बाटैं।

    ​२०७८ सालमे सम्पन्न एमालेके आठौँ जिल्ला अधिवेशनसे २३३ मत पाके सात मतके अन्तरले सचिवमे निर्वाचित हुइल भट्ट २०८० सालके नवौँ जिल्ला अधिवेशनसे फेन जिल्ला सचिवमे चयन हुइल रहैं। उहाँ हाल ओहे जिम्मेवारीमे बाटैं।

    ​एकर अलावा बेलौरी भन्सार नाका सञ्चालन, पुनर्वासमे कृषि क्याम्पस स्थापना, हुलाकी सडक निर्माण, दैजी–छेला औद्योगिक क्षेत्र, आरक्षपीडितके पुनःस्थापना, भूमिहीन तथा सुकुम्बासी समस्या, सिँचाइ ओ नदी नियन्त्रणजसिन विषयमे फेन उहाँ सार्वजनिक रूपमे आवाज उठाइती आइल बाटैं।

    ​चुनावमे फेन भट्ट प्रतिस्पर्धात्मक उपस्थिति देखाइल बाटैं। २०७४ सालके स्थानीय तह चुनावमे नेकपा एमालेसे बेलौरी नगरपालिकाके नगर प्रमुख पदके उम्मेदवार बनल उहाँ ६ हजार ४०७ मत पाइल रहैं।

    ​ऊ चुनावमे माओवादी केन्द्रके उम्मेदवार पोतीलाल चौधरी ६ हजार ७६४ मतसहित विजयी हुइल रहैं। भट्ट ३५७ मतके अन्तरले दोसर हुइल रहैं।

    ​ओस्तहे, २०७९ सालके प्रदेशसभा चुनावमे कञ्चनपुर निर्वाचन क्षेत्र नम्बर १ (ख) से एमालेके उम्मेदवार बनल उहाँ ७ हजार ६२५ मत पाइल रहैं।

    ​ऊ चुनावमे नेपाली कांग्रेसके उम्मेदवार दिवानसिंह विष्ट ८ हजार ५४५ मतसहित निर्वाचित हुइल रहैं। भट्ट ९२० मतके अन्तरले दोसर हुइल रहैं।

    ​राजनीतिक अनुभव, संगठनात्मक सक्रियता ओ क्षेत्रीय मुद्दामे निरन्तरके संलग्नताके आधारमे भट्टके आउइना भूमिका कैसिन होए परल कहिके बहस अइले जिल्लाभितर उठे लागल बा।

    ​उहाँके समर्थक तथा निकटस्थहुक्रे लम्बा समयके राजनीतिक योगदान ओ अनुभवअनुसार उहाँहे थप जिम्मेवारी देहे परल कहिके धारणा राखठैं।

    ​तर, आउइना चुनावमे उहाँके उम्मेदवारी वा पार्टी देहेना जिम्मेवारीबारे औपचारिक निर्णय सार्वजनिक होए सेकल नैहो।

    ​२०३६ साल माघ ४ गते जन्मल भट्ट स्नातक तहसम्मके अध्ययन करल बाटैं।

    ​राजनीतिसंगै समसामयिक राजनीति, सार्वजनिक नीति, प्रशासन, राष्ट्रिय तथा अन्तर्राष्ट्रिय घटनाक्रम ओ आधुनिक प्रविधिके विषयमे रुचि राखना उहाँ आउइना दिनमे स्थानीय, प्रदेश वा केन्द्रीय कौन भूमिकामे आघे बह्रहीं कहिके चासोके विषय बनल बा।

     

    यो खबर पढेर तपाईलाई कस्तो महसुस भयो ?

    यो खबर साझा गर्नुहोस