नेपाली काँग्रेस कञ्चनपुर निर्वाचन क्षेत्र नम्बर–१ से प्रतिनिधिसभा सदस्य उम्मेदवारके लाग गोपीप्रसाद उपाध्यायहन टिकट मिलल बा।
पार्टी केन्द्रसे सोमबार औपचारिक रूपम टिकट प्रदान कैक उपाध्यायके उम्मेदवारी टुंङिलक हो।
काँग्रेस कञ्चनपुर क्षेत्रीय सभापति रहलक उपाध्याय गगन थापा नेतृत्वके काँग्रेस निकट महाधिवेशन प्रतिनिधिसमेत हुइत।
लम्मा समयसे पार्टी संगठन विस्तार व सुदृढीकरणम सक्रिय रहती अइलक उहिनहन संगठनात्मक क्षमता, राजनीतिक परिपक्वता व जनस्तरके विश्वासक आधारम उम्मेदवार बनिलक काँग्रेस नेताहुक्र बतिल बाट।
नेपाल विद्यार्थी संघसे राजनीतिक जीवन सुरु कर्लक उपाध्याय नेविसंघ कञ्चनपुरके पूर्व सभापति हुइत। उ दुई कार्यकालसम्म कञ्चनपुर क्षेत्र नम्बर–१ के नेतृत्व कर्ती पार्टीहन आधारभूत तहसम्म बल्गर बनैना भूमिका खेलल बाट।
क्षेत्र नम्बर–१ म काँग्रेससे उपाध्यायसँग नेता भरत विष्टके नाउ फेन उम्मेदवारके रूपम चर्चाम रलसे फेन अन्ततः पार्टीसे उपाध्यायके पक्षम निर्णय कर्लक बतैल बाट।
