कञ्चनपुरके बेलौरी नगरपालिका नगरपालिका वडा नम्बर ४ म रहल श्रीपुर प्राथमिक स्वास्थ्य केन्द्रम बेलौरी नगरपालिका स्वास्थ्य शाखाके आयोजनाम निसर्ना रोग (NCD) के जोखिम न्यूनीकरण व प्रभावकारी नियन्त्रणके लाग (निसर्ना रोग नियन्त्रण व रोकथाम अभियान-२०८३ )वडा स्तरीय कार्ययोजना निमार्ण व अभिमुखीकरण कार्यक्रम ओराइल बा।
अन्तरक्रिया कार्यक्रमम जनप्रतिनिधि, स्वास्थ्यकर्मी, शिक्षक, महिला स्वास्थ्य स्वयंसेविका, सञ्चारकर्मी व विभिन्न क्षेत्रके सरोकारवालाहुकनके सहभागिता हुइल रह।सरकार निसर्ना रोग सम्बन्धी अभिमुखीकरण कार्यक्रम प्रत्येक वर्ष फागुन महिनाभित्तर सुरु कर्ना नीति लेहल हुइल से फेन यी वर्ष स्थानीय तहके निर्वाचन लगायतके कारण कार्यक्रम निर्धारित समयम हुइ निसेक्लक ढिला कैक सुरु कर्गिलक बेलौरी नगरपालिका स्वास्थ्य शाखा चौधरीखबरहन जानकारी देहल रलह।
अभिमुखीकरणके क्रमम श्रीपुर प्राथमिक स्वास्थ्य केन्द्रके प्रमुख गोविन्द विष्ट उच्च रक्तचाप, मधुमेह, मृगौला सम्बन्धी रोग व शरीरके उचाई व तौलके अनुपात पहिचानके लाग स्क्रिनिङ अभियान लगायतके निसर्ना रोगहन अवस्था,जोखिम कारक तत्व तथा रोकथामके उपायबारे वडा न ७ म अस्तहके और वडाम फेन निसर्ना रोगके बारेम टोल टोलम जाक अभियान चलैना जानकारी कराइल रलह। उ स्वस्थ खानपान, नियमित व्यायाम, धूम्रपान तथा मदिरा सेवनसे दुर हुइती स्वस्थ जीवनशैली अपनाके निसर्ना रोगके जोखिम उल्लेखनीय रूपम घटाय सेक्जिना बतैल।
कार्यक्रमम समुदायस्तरम स्वास्थ्य सचेतना अभिवृद्धि कर्ती निसर्ना रोग नियन्त्रणम स्थानीय तह, स्वास्थ्य संस्था व समुदायबीचके सहकार्यहन थप प्रभावकारी बनाइपर्नाम जोड देहल रलह। स्वास्थ्य केन्द्रके प्रमुख गोविन्द विष्ट अधिकांश मनै बेरम हिक केल स्वास्थ्य परीक्षण करैना प्रवृत्ति रहल बतैती रोग लग्लसे उपचारसे रोग लाग निदेना समय–समयम स्वास्थ्य परीक्षण कर्ना आवश्यक रहल बतैती नियमित स्वास्थ्य जाँच, सन्तुलित आहार व स्वस्थ जीवनशैली अपनाय सेक्लसे निसर्ना रोगके जोखिम न्यूनीकरण कर सेक्जिना उल्लेख कर्ल रलह।
