कञ्चनपुरके बेलौरीम सुशासनके माग कर्ती मंगलबारसे एक स्थानीय युवा केशव बोहरा आमरण अनसनमा बैथल बा।
“युवा जागी, सुशासन कायम करी” व “जनताके कर, जनताके अधिकार” कना मूल नारासहित बेलौरी बजारके भीमदत्त चोकस्थित पिपल चौताराम एक स्वतन्त्र युवा केशव कुमार बोहरा आमरण अनसनमा बैथल बाट।
नगरपालिका भित्तर विभिन्न क्षेत्रम देखापरल बेथिति अन्त् करी सुधारके माग कर्ती उ सार्वजनिक कर्लक १३ बुँदे मागपत्रम शिक्षा, स्वास्थ्य, कृषि, पूर्वाधार व सुशासनके विषयहन प्रमुख प्राथमिकताके साथ उठाइल बा।
बोहरा प्रस्तुत कर्लक माग असिक बटिन-
१. शिक्षा क्षेत्रम सुधार: शिक्षा क्षेत्रम बजेट, दिवा खाजा, नियुक्ति तथा व्यवस्थापनम हुइलक भ्रष्टाचार व अनियमितताके छानबिन कैक पारदर्शी शिक्षा प्रणाली लागू कर्ना तथा विद्यालय व्यवस्थापनम राजनीतिक हस्तक्षेप अन्त् कर्ना।
२. नि:शुल्क स्वास्थ्य सेवा: नगर अस्पताल तथा स्वास्थ्य चौकीम दवाई, जनशक्ति व सेवाम हुइलक बेथिति अन्त्य कैक नि:शुल्क गुणस्तरीय स्वास्थ्य सेवा सुनिश्चित कर्ना।
३. खानेपानी व्यवस्था: खानेपानी आयोजनाम हुइलक अनियमितता व भ्रष्टाचारके छानबिन कैक नगर भित्तरके सक्कु घरधुरीम सुरक्षित खानेपानीके व्यवस्था कर्ना।
४. कृषि सेवा सुधार: किसानके नामम अइलक अनुदान, बीउबिजन तथा मलखादम हुइलक दुरुपयोग रोक्ती वास्तविक किसानहुकन केल सेवा उपलब्ध कर्ना।
५. खेलकुद तथा युवा कार्यक्रम: खेलकुद बजेटके दुरुपयोग रोक्ती युवामैत्री संरचना व कार्यक्रम पारदर्शी रूपम सञ्चालन कर्ना। प्रत्येक वडाम खेलमैदान निर्माण, योग्यताके आधारम समिति नियुक्ति तथा राजनीतिक हस्तक्षेप अन्त्य कर्ना।
६. बजार अनुगमन: बजारम हुइना कालोबजारी, नापतौल ठग्ना तथा म्याद नाघल वस्तु बिक्री रोक्ना प्रभावकारी बजार अनुगमन कर्ना।
७. बालबालिका संरक्षण: १८ वर्ष मुनिके बालबालिकाहुकन सुर्तीजन्य पदार्थ तथा मदिरा बिक्री कर्ना कार्य पूर्ण रूपम निषेध कर्ना।
८. कानुनी कारबाही: सूचनाके हक हनन कर्ना पदाधिकारी तथा कर्मचारीहुकनके उपर कानुनअनुसार कडा कारबाही कर्ना।
९. कर्मचारी व्यवस्थापन: स्वीकृत दरबन्दी बाहेक कानुन व प्रक्रिया मिच्क अनियमित रूपम नियुक्त कर्लक सम्पूर्ण करार कर्मचारीहुकन तत्काल हटइना।
१०. सडक मर्मत: बेलौरी नगरपालिकाम अलपत्र परल सम्पूर्ण सडक यथाशीघ्र मर्मतसम्भार कर्ना।
११. ढल निकास व्यवस्थापन: अलपत्र परल सरसफाइ तथा ढल निकासके दीर्घकालीन व्यवस्थापन कर्ना।
१२. सार्वजनिक सम्पत्ति संरक्षण: निर्माण सम्पन्न सार्वजनिक सम्पत्तिके संरक्षण कैक सञ्चालनम लन्ना।
१३. युवा स्वरोजगार: युवाहुकन रोजगारी, उद्यमशीलता व आत्मनिर्भर बनैना कार्यक्रम सञ्चालन कर्ना।
अनसनकारी बोहराके समर्थकहुकनके उपर उल्लेखित माग तत्काल सम्बोधन निहुइलसे थप संघर्ष कर्ना चेतावनी समेत देहल बाट।
