नेपाल ईट्टा उद्योग महासंघके १९औँ स्थापना दिवसके अवसरम सुदूरपश्चिम प्रदेश समिति धनगढीस्थित मानवसेवा आश्रमम रहल वृद्ध, असक्त, असहाय व अलपत्र परल ४५ जहन फलफूल बत्ल बाट।
महासंघके सामाजिक उत्तरदायित्व अन्तर्गत आयोजित कार्यक्रमम आश्रमम आश्रित मनैनहन शनिबार फलफूल बत्लक समिति चौधरीखबरहन जनाइल रलह।
कार्यक्रम सुदूरपश्चिम प्रदेश अध्यक्ष बलदेव सिंह बुडालके अध्यक्षताम ओराइल रह कलसे बर्का पहुनाके रूपम महासंघके शंकर बहादुर चन्द सहभागी हुइल रलह।
कार्यक्रमम महासंघ निवर्तमान अध्यक्ष शिवराज पाण्डे, सल्लाहकार सदस्य, सह–सचिव कृष्णबहादुर तामाङ, उद्योगी रमेश बिष्ट, कोषाध्यक्ष सुरज श्रेष्ठ, प्रदेश वरिष्ठ उपाध्यक्ष व अन्य सदस्यहुकनके उपस्थिति हुइल रह।
कार्यक्रमम बोल्ती अध्यक्ष बलदेव सिंह बुडाल उद्योग क्षेत्रसे नाफामुखी गतिविधिके सँग सामाजिक उत्तरदायित्व फेन वहन करपर्ना बतिल।
उ समाजके विपन्न, असहाय व उपेक्षित वर्गप्रति सहयोग पुगैना उद्योगीहुकनके दायित्व हुइलक उल्लेख कर्ती असिन कार्यक्रमहन आघक दिनम ओर विस्तार कर्ना जनैल।
अस्तकह बर्का पहुनाके अनुसार शंकर बहादुर चन्द स्थापना दिवसहन केवल औपचारिकताम सीमित नि धैक सामाजिक सेवासे जोड्क मनैना सकारात्मक सन्देश रहल बतैल।
उ उद्योगीहुक्र समाजके अभिन्न हिस्सा हुइलक ओहरसे मानव सेवा व सामाजिक सहयोगके कार्यहन निरन्तरता देहपर्नाम जोड देल।
मानवसेवा आश्रमके प्रतिनिधिहुक्र महासंघके असिन कामप्रति आभार व्यक्त कर्ल बाट।
