सशक्त महिला समृद्ध नेपाल कार्यक्रम अन्तर्गत टेवाकके साझेदारी व एकता नेपालके आयोजनाम सामुदायिक सुरक्षा जालो व महिलावादी आन्दोलन सुदृढिकरण परियोजना अन्तर्गत सार्वजनिक सुनुवाई व संवाद कार्यक्रम ओराइल बा।
कार्यक्रम बेलौरी नगरपालिका वडा नं. ४ स्थित उद्योग वाणिज्य संघम आयोजना हुइल रह।
कार्यक्रमके सुरुवात एकता नेपालके कार्यालय प्रमुख राज चौधरी कर्ल रलह। टेवाके कार्यक्रम अफिसर राधिका परियार टेवाके उद्देश्य तथा सामुदायिक सुरक्षा जालोसम्बन्धी जानकारी प्रस्तुत कर्ल। प्यानल छलफलके सहजिकरण सानु चौधरी कर्ल रलह।
कार्यक्रमम नगर उप-प्रमुख जोगराम चौधरी, कार्यपालिका सदस्य आरती चौधरी, श्रीपुर स्वास्थ्यबाट इन्दु खरेल, इलाका प्रहरी कार्यालयके प्रहरी निरीक्षक कमल प्रसाद चौधरी तथा सामुदायिक सुरक्षा जालोकी संयोजक निर्मला चौधरी वक्ताके रूपम सहभागी हुइल रह।
सार्वजनिक सुनुवाई कार्यक्रमम सामुदायिक सुरक्षा जालो, महिला कृषक समूह, युवा सञ्जाल, किशोरी सञ्जाल, बाल क्लब तथा विभिन्न संघसंस्थाके कैक ५६ जना प्रतिनिधिहुकनके सहभागिता फेन रह।
कार्यक्रमम बोल्ती कार्यपालिका सदस्य आरती चौधरी महिलाके आर्थिक सशक्तिकरणके लाग थारु पहिरन (लेहेङ्गा) बनैना तथा चप्पल बनैना तालिम प्रदान कर्लक ओहरसे महिलाहुक्र आत्मनिर्भर बन्ती गैलक बतैल। सँग संग उ आगामी आर्थिक वर्षम लैंगिक तथा यौनिक अल्पसंख्यक समुदायके लाग विशेष कार्यक्रम सञ्चालन कर्ना चौधरीखबरहन जानकारी देहल रलह।
अस्तकह नगर उप-प्रमुख जोगराम चौधरी महिलाहुकन उद्यमशीलताम जोड्क आर्थिक रुपम सशक्त बनैना कार्यम नगरपालिका लगति रहल बतैल। कोइ महिलाहुक्र व्यवसाय सुरु कैक आत्मनिर्भर बन्न सफल हुइलक फेन उ उल्लेख कर्ल रलह।
प्यानल छलफलके पाछ आयोजित खुल्ला छलफलम सहभागीहुक्र विभिन्न जिज्ञासा तथा प्रश्न धरल रलह। जवाफ देती उप-प्रमुख चौधरी लक्षित वर्गके लाग बजेट विनियोजन हुइती अइलक हुइलसे फेन आगामी आर्थिक वर्षम लैंगिक तथा यौनिक अल्पसंख्यक समुदाय, किशोरी तथा महिलाहुकन उद्यमशीलता व रोजगारीम जोड्न विशेष बजेट छुट्याइना प्रतिबद्धता व्यक्त कर्ल रलह।
कार्यक्रमसे स्थानीय स्तरम महिला सशक्तिकरण, समावेशी विकास व सामुदायिक सुरक्षा जालो सुदृढिकरणम टेवा पुग्ना विश्वास लेहल बा।
