कञ्चनपुर लालझाडी गाउँपालिकाके १८ औँ गाउँसभा अधिवेशनसे आगामी आर्थिक वर्ष २०८२।८३ क लाग नीति तथा कार्यक्रम सर्वसहमतसे पारित हुइल बा।
शुक्रबार ,गाउँपालिका अध्यक्ष तथा सभाध्यक्ष निर्मल रानाके अध्यक्षताम बैठ्लक पहिलक बैठकम स्थानीय विपद् व्यवस्थापनसे सामाजिक विकास, पूर्वाधार निर्माण, वित्तीय व्यवस्थापन व सुशासनसमेत समेत्लक विषयम छलफल हुइल रह ।
विपद् व्यवस्थापनम स्थानीय कोषहन निरन्तरता देना, जंगली जनावर व छाडा पशुसे बाली नाली नोक्सान कम कर्ना मेसवायर जडान कर्ना, जोखिम क्षेत्र पहिचान कैक सुरक्षित स्थल तोक्लक व दमकल सेवा सञ्चालनम लन्ना योजना बा । साथै, विपद् स्वयमसेवकहुकनके क्षमता विकास कैक तालिम प्रदान कर्ना व्यवस्था करल बा।
संस्थागत विकास व सेवा प्रवाहम नागरिकमैत्री सेवाक लाग हेल्प डेस्क, गुनासो पेटिका, सार्वजनिक सुनुवाई जस्त उपाय प्रभावकारी लागु हुइना बाट । रोजगार सेवा केन्द्र मार्फत श्रमिक परिचालन व बेरोजगारहन जीवनोपयोगी सीप सिखैना कार्यक्रम आघ बढैना बाट। वैदेशिक रोजगारीहन सुरक्षित बनैना सुरक्षित आप्रवासन कार्यक्रम सञ्चालन हुई कैक अनौपचारिक क्षेत्रम रलक श्रमिकहुकनहन सामाजिक सुरक्षा कोषम आवद्ध करिना योजना बा ।
पूर्वाधार विकास अन्तर्गत सडक, पुल, भवन निर्माण व स्तरोन्नतीमा जोड देना बा। सडक विस्तार, चक्रपथ निर्माण, प्रशासनिक भवन तथा विद्युतीय व सौर्य उर्जाम आधारित आधुनिक सिँचाई प्रविधि विस्तार कर्ना बा। तटबन्ध निर्माण व मर्मत सम्भारहन प्राथमिकता देनाके साथै वृक्षारोपणम विशेष ध्यान देना बा ।
सामाजिक विकासम निःशुल्क गुणस्तरिय आधारभूत स्वास्थ्य सेवा उपलब्ध करिना, स्वास्थ्य पूर्वाधार व औषधि उपलब्धता सुनिश्चित करिना, सुत्केरी सेवा, खोप तथा जेष्ठ नागरिकहुकन निःशुल्क एम्बुलेन्स सेवा प्रदान कर्ना प्रावधान करल बाट।
वित्तीय व्यवस्थापन सुशासनम आन्तरिक नियन्त्रण प्रणाली बल्गर बनैना, सार्वजनिक खर्च पारदर्शी व मितव्ययी बनैना बा । कर संकलन प्रणाली चुस्त दुरुस्त बनाक करदाता मैत्री नीति अवलम्बन कर्ना बा। सेवा प्रवाहम सार्वजनिक सुनुवाई, गुनासो व्यवस्थापन व नागरिक सन्तुष्टि सर्वेक्षण कर्ना योजना बा। साथै, स्मार्ट गाउँपालिका तथा स्मार्ट जनप्रतिनिधि व कर्मचारी कार्यक्रम फेन आघ बढैना बा।
सूचना तथा सञ्चार प्रविधिमा डिजिटल ई-गभर्नेन्सलहन प्राथमिकता देना, सरकारी वेबसाइट व सामाजिक संजालमार्फत सूचनाम प्रवाह कर्ना, सार्वजनिक स्थानम सिसिटिभी जडान व ई-हाजिरी प्रणाली लागु कर्ना योजना बनाइल बाट।
सुरक्षा व्यवस्थापनम आपराधिक गतिविधि नियन्त्रण कर्ना सुरक्षा निकायसँग सहकार्य कर्नस व वडा नं. ६ के चान्देव बजार क्षेत्रम अस्थायी प्रहरी पोष्ट स्थापना कर्ना व्यवस्था करल बा।
बैठकम सभाध्यक्ष निर्मल राना नीति तथा कार्यक्रमके प्रभावकारी कार्यान्वयनम सक्कु सरोकारवालाके सक्रिय सहभागिता आवश्यक रहल बताइल रलह। यह असार ९ गते बिहानक ११ बजे और बैठक बैठ्ना कैक अधिवेशन स्थगित कर्गिलक बाट ।
लालझाडी गाउँपालिका गाउँ सभाके सचिवालयमार्फत गाउँ सभा सञ्चालन ऐन बमोजिम नयाँ अभ्यासक साथ सभा सञ्चालन कर्लक सभाक सचिव एवं प्रमुख प्रशासकीय अधिकृत राज बहादुर सार्की चौधरी खबरहन जानकारी देहल रलह।
दिनेश चौधरी
