बेलाैरी / कञ्चनपुर
कञ्चनपुरके बेलडाँडी गाउँपालिका आर्थिक वर्ष २०८२/८३ के लाग नीति, कार्यक्रम व बजेट सार्वजनिक करल बा।
मंगलबार ओरिलक १७ औँ गाउँसभासे स्थानीय सरकारके नेतृत्वम आघक वर्षक लाग कुल ५४ करोड ५० लाख ४४ हजार रुपैयाँ बराबरके बजेट स्वीकृत क्रगिलक हो।
गाउँपालिका अध्यक्ष हरिशचन्द्र रानाके अनुसार चालूतर्फ ३७ करोड ४३ लाख रुपैयाँ व पूँजीगततर्फ १७ करोड ७ लाख रुपैयाँ विनियोजन क्रगिल बा।
स्रोतके विवरण देती उ आन्तरिक आम्दानीतर्फ १ करोड, राजस्व बाँडफाँडतर्फ ७ करोड ९४ लाख ९० हजार, संघीय सरकारसे प्राप्त वित्तीय हस्तान्तरण ३१ करोड १४ लाख, प्रदेश सरकारसे २ करोड ४१ लाख ५४ हजार, व सामाजिक सुरक्षा भत्ता शीर्षकम १२ करोड रुपैयाँ रलक बटिल।
दलदल जमिन पुनःउत्पादन कार्यक्रम पहिल प्राथमिकताम
गाउँप्रमुख राना यी वर्ष बेलडाँडीके हजारौँ विघा उर्वर भूमि दलदलम परिणत हुइलक विगतक वर्षसे प्रयोगविहीन रहल अवस्थाहन ध्यानम धर्ती विशेष कार्यक्रम लन्लक जानकारी देल। उहाके अनुसार वडानम्बर १ से ५ सम्मक बहुत क्षेत्र दलदलीय अवस्थाम रहल ओहरसे ड्रेन्चिङ (नाली खन्ना प्रविधि) व लिफ्टिङ (पम्पिङ प्रविधि) प्रयोगमार्फत उ जमिनहन खेतीयोग्य बनैना बा।
‘हम्र अब दलदलीय जमिनहन पुनः खेतीयोग्य बनैने बाटी, यी किसानहुकनहन आत्मनिर्भर बनैने बा,’ अध्यक्ष राना कल, ‘बेलडाँडीहन कृषिम आधारित समृद्धिके डगरम लन्ना हम्र उखुखेतीम समेत जोड देथी ।’
उखुखेतीतर्फ प्रोत्साहन, कृषि आत्मनिर्भरता लक्ष्य
गाउँपालिका प्रमुखके अनुसार छिमेकी नगरपालिका बेलौरी व पुनर्वासम संचालनम रहलक चिनी मिलहन ध्यानम धर्ती उखुखेतीहन प्रवर्द्धन करैना बा। यी स्थानीय कृषकहुकन चिनी उद्योगसे जोड्ना हुकनके आर्थिक हैसियत सुदृढ बनैना अपेक्षा करल बाट छ।
बन्यजन्तु–मानव द्वन्द्व न्यूनिकरणतर्फ नयाँ पहल
शुक्लाफाँटा राष्ट्रिय निकुञ्जसे प्रत्यक्ष सीमाना जोड्लक १, २ व ५ नं. वडाम बन्यजन्तु व मानवबिचके द्वन्द्वहन न्यूनिकरण क्रना सोलार बत्ती जडान करैना योजना समेत बजेटम समेतल बा। रात्क बन्यजन्तुहुकनके बस्तीम प्रवेश रोकक लाग सोलार बत्तीसे चेतनामूलक कार्यक्रम फेन संचालन कर्ना बताइल बाट।
गौरवके योजना पुनःसञ्चालनम
गत वर्षहरूम प्रारम्भ क्रगिलक कतिपय गौरवक योजनाहन यी वर्ष सशक्त रूपम पुनःसञ्चालन क्रना प्रमुख राना बटिल। उमध्ये १५ सैयाके अस्पताल, कोल्ड स्टोर सञ्चालन, बेलडाँडीसे शुक्लाफाँटा निकुञ्जसम्मके पर्यटन रुटके संचालन, शासकीय विद्यालयम पूर्ण निःशुल्क शिक्षा, आधारभूत स्वास्थ्य सेवा, पूर्वाधार विकास, डगर निर्माण लगायतके कार्यक्रम प्रमुख रूपम आघ सर्नेनै बा।
उहाके अनुसार गाउँपालिका पूर्वाधारसँगै सामाजिक क्षेत्र, शिक्षा, स्वास्थ्य, कृषि व पर्यटनके बहुआयामिक विकासहन समेत्ना रणनीति अवलम्बन क्रनाबा। “स्थानीय स्रोतके अधिकतम उपयोग, संघीय व प्रदेश सरकारके समन्वय व साझेदारीम हम्र विकासके नयाँ युगतर्फ आघ बहड्बी” उ कल।
बेलडाँडी गाउँपालिकाके चालु आर्थिक वर्षके बजेट व कार्यक्रम समग्र ग्रामीण जनजीवन सुधार क्रना अभिप्राय तर्जुमा क्रगिल देखाइत। दलदल जमिन पुनःउत्पादनसे लेक पर्यटन व कृषि आत्मनिर्भरता, स्वास्थ्य व शिक्षा सुधारसम्मके बहुआयामिक कार्यक्रमल गाउँपालिकाके समावेशी व दीर्घकालीन विकास रणनीति झल्किथा आब हिकनके प्रभावकारी कार्यान्वयन नै ग्रामीण समृद्धिके कुशलता मापन क्रना मुख्य आधार बनहिन।
