कञ्चनपुरके बेलौरी नगरपालिका वडा नम्बर ७ म सार्वजनिक सुनुवाई कार्यक्रम ओराइल बा।
सोमबार, बेलौरी नगरपालिका वडा नम्बर ७ का वडाध्यक्ष प्रकाश श्रेष्ठके अध्यक्षताम बेलौरी नगरपालिकाके विभिन्न शाखाके प्रमुख, सामुदायिक व संस्थागत विद्यालयके प्रधानाध्यापक, सुरक्षाकर्मी,भलमन्सा,समाजसेवी,बुद्धिजीवी लगायत सरोकारवालाहुकनके ढिउर से ढिउर उपस्थिति रह।
सुनुवाईके क्रमम स्थानीयहुकनके ज्येष्ठ नागरिकहन वितरण कर्ना सामाजिक सुरक्षा भत्ता वडा कार्यालयम वितरण कर्अ पर्ना माग धर्ती बैंकसम्म पुगपर्न झन्झट व लम्मा दूरीके कारण वृद्धवृद्धाहुकन समस्या हुइलक बताईल रलह।अस्तकह किसानहुकनके धानके उचित मूल्य निपैलक गुनासो कर्ती सरकार त्वाकल मूल्यम खरिद कर्ना बेलौरीमै खाद्य व्यवस्था व व्यापार कम्पनी लिमिटेडके डिपो स्थापना कर्अ पर्ना माग धर्ल रलह। किसानहुकन आवश्यक परल बेला रासायनिक मल अभाव हुइलक कति नगरपालिकाके कृषि शाखाह तत्काल पहल कर्अ पर्नाम जोड देहल रलह।
पञ्जीकरण शाखाके प्रमुख कुमार सिंह नगारी स्थानीयके मागप्रति सकारात्मक प्रतिक्रिया जनैति बैंकसे समन्वय कैक आगामी त्रैमासिकसे सामाजिक सुरक्षा भत्ता टोल–टोलमै वितरण कर्ना प्रतिबद्धता व्यक्त कर्ल रलह। कृषि शाखा किसानके मागहन सम्बोधन कर्ना सम्बधित निकायम मल आपूर्तिके समस्या समाधानके लाग तत्काल कदम चल्ना प्रतिबद्धता जनाइल बाट।
वडाध्यक्ष प्रकाश श्रेष्ठ कल" वडाबासीहुक्र देलक सुझावहन मनन कैक मार्गदर्शकके रूपम लेना बतैटी वडा कार्यालय जन्तनके नजिकके सरकार हो। नगरपालिकासे विनियोजित कर्लक बजेटसे सक्कु क्षेत्रहन सम्यात निसेक्लक बतैटी वडाके विकासके लाग प्रदेश व केन्द्र सरकारसे आवश्यक समन्वय हुइता कैक बताइल रलह।
सार्वजनिक सुनुवाई कार्यक्रमके सहजीकरण बेलौरी नगरपालिका विपद् व्यवस्थापन शाखाके प्रमुख अशोक पाण्डेय कर्ल रलह।
