कञ्चनपुरके बेलौरी नगरपालिका वडा नम्बर १० के आयोजनाम महिला स्वास्थ्य स्वयं सेविका व भलमन्साहुकन प्रोत्साहनके लाग साईकल व पानी ततैना जग व थर्मस वितरण हुइल बा।
सोमबार, बेलौरी नगरपालिका वडा नम्बर १० के आयोजनाम महिला स्वास्थ्य स्वयं सेविकाहुकन साईकल व भलमन्साहुकन पानी ततैना जग व थर्मस प्रोत्साहनके लाग वितरण कर्ल रलह।
कार्यक्रमम बेलौरी नगरपालिका वडा नम्बर १० के वडा अध्यक्ष सोमलाल चौधरीके सभापतित्वम बर्का पहुना बेलौरी नगरपालिकाके नगर कार्यबाहक प्रमुख हर्क बहादुर भुल,खास पहुना बेलौरी नगरपालिकाके निमित्त प्रमुख प्रशासकीय अधिकृत झपीराज ओझा, महिला स्वास्थ्य स्वयंसेविका, भलमन्साहुकनके उपस्थिति रह।
नगर कार्यबाहक प्रमुख हर्क बहादुर भुल कल" सबसे पहिल त असिन कार्यक्रम धर्लक ओहरसे वडाध्यक्षहन विशेष धन्यवाद देहतु काजे कि यी प्रोत्साहन कार्यक्रमसे पक्कै फेन काम कर्ना थप उर्जावन शक्ति प्रदान हुहिन अत्रकेल नि होक समाजहन सफल बनैना भलमन्सनके यकदम भारी जिम्मेवारी हुइलक ओहरसे प्रोत्साहन देना जरुरी बा।अस्तहक महिला स्वास्थ्य स्वयंसेविका हुनकनके फेन रातदिन खत पर्ना हुइलक ओहरसे फेन हौसेला मिलहिन कन हिसाबले फेन वडासे बजेट छुत्याक यी कार्यक्रमके आयोजना कर्लक हो विशेष कैक सक्कुजहन मजासे आपन कामहन निरन्तरता देती आघ बढ्हो कति शुभकामना देहल रलह।
बेलौरी नगरपालिका निमित्त प्रमुख प्रशासकीय अधिकृत झपी राज ओझा कल" बेलौरी नगरपालिका वडा नम्बर १० म महिला स्वास्थ्य स्वयंसेविका व भलमन्साहुकहन प्रोत्साहन कार्यक्रम छुती हुइलसे फेन हुकन हुकनके योगदानके उच्च सम्मान कर्ती व भलमन्साहुकनके भुमिका समाजहन रुपान्तरण कर्ना यकदम भारी जिम्मेवारी रथिन तब्ब मार आगामी दिनम फेन वडासे अस्तह कार्यक्रम कर्ती जाय कना ओर बेलौरी नगरपालिकासे कर पर्ना सहयोग सद्दभर हातोमालो कर्ती तुहनके साथ आघ बहड्ती जाइ कना प्रतिबद्धता जाहेर कर्ल रलह।
सभापति वडा अध्यक्ष सोमलाल चौधरी कल" छुती कार्यक्रम कर्लसे फेन यी कार्यक्रमसे कामम जोस जाआगर उत्साहके साथ आघ बहड्नाम प्रेरणा मिलहिन कना उदेश्यके साथ स्वयंसेविका हुकन १६ थो साईकल व भलमन्साहुकन ११ थो पानी ततैना जग थर्मस वितरण कैगिल रह। हुकनके कहल हस देह नि सेक्लसे फेन समाजम सकारात्मक भुमिका खेल्ती थप उर्जावन होय स्यकत कना हिसाबसे वडा न १० के बजेटमसे छुत्याक कार्यक्रम धर्लक हो। यदि अप्ने हुक्र मजासे काम कर्ती जिबि त यीहिनसे ओर भारी प्रोत्साहन कर्ना हन्र सोच बनैल बती। हमार वडासे देहल समानहन सही ठाउम सदुपयोग कर्बी कना बिश्वास लेल बाती l
कार्यक्रमके सञ्चालन बेलौरी नगरपालिका वडा नम्बर १० म कार्यरत सचिव रेशम चौधरी यकदम मजासे कर्ल रलह।
