कञ्चनपुरके बेलौरीम आईतबार राष्ट्र निर्माता पृथ्वी नारायण शाहके स्मृतिम ३०४ औं पृथ्वी जयन्ती तथा राष्ट्रिय एकता दिवस भव्यताके साथ मनैल बाट।
कार्यक्रमम बोल्ती बर्का पहुना नगर उप-प्रमुख चौधरी राष्ट्र निर्माता पृथ्वी नारायण शाहके योगदान सद्द स्मरणीय रना उल्लेख कर्ती नेपालहन एकीकरण कैक स्वतन्त्र व सार्वभौम राष्ट्रके रूपम स्थापित कर्ना पृथ्वी नारायण शाहके योगदानहन भावी पुस्ता आत्मसात करपर्नाम जोड देहल रलह।
कार्यक्रमके सभापति टेकबहादुर साउद पृथ्वी जयन्ती केवल औपचारिक कार्यक्रम केल नि होक राष्ट्रिय चेतना जगैना अवसर हुइलक बतैटी पृथ्वी जयन्ती हमन सक्कुजहन एकताबद्ध होक देशप्रति जिम्मेवार बन्ना प्रेरणा देहल बताइल रलह।
बेलौरी बजारसे सुरु हुइलक प्रभातफेरीम नेपाल प्रहरी, सशस्त्र प्रहरी बल नेपाल, भूतपूर्व सैनिक तथा समुदायके प्रतिनिधि व स्थानीय विद्यालयके विद्यार्थीहुकनके सहभागिता रह।प्रभातफेरीम झाँकीसहित बजार परिक्रम कर्ल रलह।
कार्यक्रमम बोल्तीअधिकाँश वक्ता पृथ्वी जयन्ती तथा राष्ट्रिय एकता दिवस विशेष कार्यक्रम नगरपालिकासे नै आयोजना करपर्नव जोड देहल रलह।
कार्यक्रम बेलौरी बाल उद्यानम राष्ट्र निर्माता पृथ्वी नारायण शाहके तस्बिरम माल्यार्पण, सांस्कृतिक प्रस्तुति तथा विभिन्न विद्यालयके विद्यार्थीहुक्र नृत्य प्रस्तुत कर्ल रलह।
कार्यक्रमके सञ्चालन सिद्ध बाबा एकेडेमीके प्रधानाध्यापक खडक शाह कर्ल रलह।
