कञ्चनपुरके बेलौरी नगरपालिका वडा नम्बर ८ म महिला स्वास्थ्य स्वयं सेविका व भलमन्साहुकन साईकल व मन्द्रा, धोलक सम्मान सोरुप देहल बा।
आइतबार, बेलौरी नगरपालिका वडा नम्बर ८ के आयोजनाम महिला स्वास्थ्य स्वयं सेविका व भलमन्साहुकन प्रोत्साहन सोरुप साईकल व मन्द्रा, धोलक देहल बाट।
कार्यक्रमम बेलौरी नगरपालिका वडा नम्बर ८ के वडा अध्यक्ष विषराम रानाके सभापतित्वम बर्का पहुना बेलौरी नगरपालिका नगरप्रमुख पोतीलाल चौधरी, खास पहुनाहुक्रा वडा सदस्य ज्ञानु चौधरी, रती राम चौधरी, लक्ष्मी चन्द व वडा समितिके संयोजक जगतराम चौधरी लगायत भलमन्साहुकनके व स्वयं सेविकाहुकनके उपस्थिति रह।
कार्यक्रमम स्वागत मन्तव्य वडा सदस्य लक्ष्मी चन्दके अनुसार हम्र वडाके बजेडसे छुटीमुती प्रोत्साहन जोस जागर हुहिन कैक महिला स्वास्थ्य स्वयं सेविका हुकनके लाग १३ थो लेडिज साईकल व भलमन्साहुकनके लाग १० थो मन्द्रा व ५ थो धोलक प्रोत्साहन सोरुप लेह आदेलो ओकर लाग विशेष धन्यवाद देती आगामी दिनम फेन अस्तह कार्यक्रम कर्ती जाब कना प्रतिबद्धता जाहेर कर्ल रलह।
कार्यक्रमके सभापति बेलौरी नगरपालिका वडा नम्बर ८ के वडाध्यक्ष विषराम राना कल"हमार वडाम रहल सक्कु जातजातिनके भेषभुषा, संस्कृति बचाईक लाग हम्र वडासे सेक्ना जतीके बजेडसे सम्मन कर्ती आइती अस्तकह महिला स्वास्थ्य स्वयं सेविकाहुकनके मेहनत रातदिन घामपानी नि हेर्क सेवाम खट्ल रथ हुकनके ओर होसेला बढहिन कना हिसाबसे छुती हुइलसे फेन सम्मान कना भारी महोत्व रहथ व भलमन्साहुकहन फेन कुछ काम कर्नाम उत्साहके साथ जोस जागर हुहिन कना हेतुसे असिन आयोजना कर्लक हो।आगामी दिनम फेन कसिन कार्यक्रम लन्ना हो कैक सक्कु जहनसे हातोमालो कर्ती आघ बहडना प्रतिबद्धता जाहेर कर्ल रलह।
कार्यक्रमके सञ्चालन वडा नम्बर ८ के वडा सचिव भागेश्वरी थापा एकदम मजासे कर्ल रलह।
