कञ्चनपुरके बेलौरीम स्वास्थ्यके लाग खेलकुद, राष्ट्रके लाग खेलकुद” कना मूल नाराके साथ बेलौरी ब्याडमिन्टन क्लबके आयोजनाम सुदुर पश्चिम प्रदेश स्तरीय खुल्ला ब्याडमिन्टन प्रतियोगिताके उद्घाटन हुइल बा।कार्यक्रमके सभापति क्लबके अध्यक्ष अशोक श्रेष्ठ, बर्का पहुना बेलौरी नगरपालिकाके नगर उप-प्रमुख जोगराम चौधरी, खास पहुनाहुक्र बेलौरी नगर खेलकुद समितिके अध्यक्ष रामेश्वर न्यौपाने, नाष्ट कलेज धनगढीके प्रबन्ध निर्देशक शिवहरि मुडभरी, चैतन्य पाठशालाके इन्चार्ज ईश्वर गिरी, लगायत खेलाडी, खेलप्रेमी व स्थानीय सञ्चारकर्मीहुकनके उपस्थिति हुइल रह। 
कार्यक्रमम स्वागत मन्तव्य धर्ती बेलौरी ब्याडमिन्टन क्लबके सल्लाहकार संयोजक दिनेश कुँवर खेलकुदके माध्यमसे स्वस्थ समाज निर्माणसँग युवाहुकन सकारात्मक गतिविधि ओहर उन्मुख कर्ना उद्देश्य लेक प्रतियोगिता आयोजना कर्गिलक बटिल।
कार्यक्रमहन सम्बोधन कर्ती बेलौरी नगर खेलकुद समितिके अध्यक्ष रामेश्वर न्यौपाने खेलकुदसे युवाहुकनके क्षमता, अनुशासन व आत्मविश्वास अभिवृद्धि कर्ना उल्लेख कर्ती असिन प्रतियोगितासे स्थानीय स्तरम लुकल रहल प्रतिभाहन उजागर कर्ना महत्वपूर्ण भूमिका खेल्ना बटैती खेलकुद क्षेत्रके विकासके लाग नगर खेलकुद समिति सद्द सहयोग कर्ना प्रतिबद्धता समेत व्यक्त कर्ल रलह।कार्यक्रमम बोल्ती चैतन्य पाठशालाके इन्चार्ज ईश्वर गिरी खेलकुद केवल प्रतिस्पर्धाके माध्यम नि होक स्वस्थ, सभ्य व जिम्मेवार नागरिक निर्माण कर्ना महत्वपूर्ण आधार भहुइलक बटैती शिक्षा व खेलकुदहन सँगसँग आघ बरैना सेक्लसे समग्र समाजके विकासम सकारात्मक प्रभाव पर्ना बताइल रलह।
कार्यक्रमम बोल्ती नाष्ट कलेज धनगढीके प्रबन्ध निर्देशक शिवहरि मुडभरी खेलकुदसे मनैनके शारीरिक तन्दुरुस्त केल नि होक मानसिक विकास, अनुशासन व नेतृत्व क्षमताके समेत विकास हुइना बटाइल रलह। खेलकुदके कार्यक्रमहन निरन्तर रुपसे सहयोग कर्ती अइती रहल बटाइल रलह। 
कार्यक्रमहन सम्बोधन कर्ती बर्का पह?ना तथा बेलौरी नगरपालिकाके नगर उप-प्रमुख जोगराम चौधरी खेलकुदसे स्वस्थ समाज निर्माणके साथ युवाहुकनम अनुशासन, नेतृत्व क्षमता व प्रतिस्पर्धात्मक भावना विकास कर्ना बटाइल रलह। उ कल स्थानीय तहसे खेलकुद क्षेत्रके विकासके लाग आवश्यक सहयोग व प्रोत्साहनहन निरन्तरता देना प्रतिबद्धता व्यक्त कर्ल रलह।
कार्यक्रमके समापनम बोल्ती सभापति तथा बेलौरी ब्याडमिन्टन क्लबके अध्यक्ष अशोक श्रेष्ठ बेलौरीम ब्याडमिन्टन खेलप्रतिके आकर्षण बहड्ती गैलक उल्लेख कर्ती खेलाडीहुकनके क्षमता अभिवृद्धि व खेलकुद संस्कृतिके विकासके लाग प्रतियोगिता आयोजना कर्गिलक बटैती प्रतियोगिताहन भब्री व सभ्य रुपम सफल पर्ना सहयोग कर्ना सक्कु सहयोगी,प्रायोजक तथा सहभागीप्रति आभार व्यक्त कर्ल रलह।
दुई दिनसम्म सञ्चालन हुइना प्रतियोगिताम सुदूरपश्चिम प्रदेशके विभिन्न जिल्लासे ३२ टिम सहभागिता रहल आयोजक चौधरीखबरहन जानकारी देहल रलह। प्रतियोगिताम प्रथम हुइना टिमहन नगद रु. ३५ हजारसहित ट्रफी, मेडल व प्रमाणपत्र, द्वितीय हुइना टिमहन नगद रु. २० हजारसहित ट्रफी, मेडल व प्रमाणपत्र तथा तृतीय हुइना टिमहन नगद रु. १० हजारसहित ट्रफी, मेडल व प्रमाणपत्र प्रदान कर्ना आयोजक बताइल रलह।
उद्घाटन कार्यक्रमके सञ्चालन चिया ग्रुप बेलौरीके महासचिव अशोक पाण्डेय यकदम मजासे कर्ल रलह।
