कञ्चनपुरके बेलौरी नगरपालिका वडा नम्बर ९ के आयोजनाम गौडी टोलम लैङ्गिक हिंसा सम्बन्धी दुई दिने जनचेतनामूलक अभिमुखीकरण कार्यक्रम ओराइल बा।
बुधवार,बेलौरी नगरपालिका वडा नम्बर ९ के आयोजनाम गौडी टोल,लक्ष्मी नारायण टोलम लैङ्गिक हिंसा सम्बन्धी दुई दिने जनचेतनामूलक अभिमुखीकरण कार्यक्रम ओराइल रह।
कार्यक्रमम बेलौरी नगरपालिका वडा नम्बर ९ के वडा अध्यक्ष किशन सिंह रानाके सभापतित्वम लैङ्गिक हिंसा सम्बन्धी मनोसामाजिक कर्ता कल्पना चौधरी, बेलौरी नगरपालिका वडा नम्बर ९ के वडा सचिव पार्वती बिष्ट, आधारभूत स्वास्थ्य शाखाके सुरेन्द्र अवस्थी, स्वयंसेविका पार्वती भट्ट, समाजसेवी बुद्धिजीवी इन्द्रदेव भट्ट लगायतके उपस्थिति रह।
प्रशिक्षण दिहुइया मनोसामाजिक कर्ता कल्पना चौधरीके अनुसार" समाजम देखापर्ना ढिउर से ढिउर लैङ्गिक हिंसा महिला पुरुष दुनु पक्षम देखा परत। पुरुष से ज्यादा महिलाहुकनम देखा परत यकआपसम झगडा हुइना,बालबिवाह हुइना,छाई छावाम भेदभाव कर्ना,घर परिवारम सासू ससुरोन नै मजा मन्ना,अस्तह कारणसे मनइ मानसिक तनाव, डिप्रेसन,आत्महत्या समेत लैङ्गिक हिंसा भित्तर परथ।तब्ब ओहसे असिन ना होय कैक समय समयम आपन घरपरिवारम फेन ध्यान देना जरुरी बा। यदी कोहीहन फेन लैङ्गिक हिंसाम परल रलसे नेपाल प्रहरी १००म, राष्ट्रिय महिला आयोग १४ १५म, बालबालिका खोजतलास तथा समन्वय केन्द्र १०४म आत्महत्या रोकथाम तथा नियन्त्रण ११६६म या नजिकके मनोसामाजिक कर्ता कल्पना चौधरीहन ९८२४६८९४१८,९८४८८६४८८८ यी नम्बरम सम्पर्क कैक सहयोग लेह सेक्बो कना बाट धर्ल रलही।
वडा अध्यक्ष किशन सिंह रानाके अनुसार" लैङ्गिक हिंसा सम्बन्धी दुई दिने जनचेतनामूलक अभिमुखीकरण कार्यक्रम कर्नाके उद्देश्य हम्र यक घरी बिचार करि सुन कना महिला हुइत फलाम कलक पुरुष जस्त हुइत महिला केल लैङ्गिक हिंसाम निपर्क पुरुषफेन लैङ्गिक हिंसाम परल रठ तर पुरुष मनै मनम धर्ल रथ,महिला पुरुष कना यक रथके पाङ्रा हुइत तब्ब ओहसे हम्र छुती बच्चामसे मजा शिक्षा देना जरुरी बा,यदी मजा शिक्षा,संस्कार पाइल रही त लैङ्गिक हिंसा हुइना सम्भावना कम रही। मै जब्से वडाके अध्यक्षके हैसियतसे और वडासे ढिउर से ढिउर कार्यक्रम कर्ती आइतु अस्तकह जनता महिनसे हातोमलो कर्ती जही त आघक दिनम जनतनके लाग वडाके बजेड हेर्क आघ बहड्बी कना प्रतिबद्धता जाहेर कर्ल रलह।
स्वयंसेविका पार्वती भट्टके अनुसार" जौन लैङ्गिक हिंसा सम्बन्धीके बेलौरी नगरपालिका वडा नम्बर ९ के वडा कार्यालय परिवारहन विशेष धन्यवाद देहतु, काजे कि हमिनहन लैङ्गिक हिंसा बारेम जानकारी नि रह, यी कार्यक्रमसे बहुत ज्ञान पैली आब हम्र आपन घर परिवारमसे परिवर्तन कर्ना सुरुवात कर्बी कति वडा अध्यक्ष किशन रानाहन विशेष धन्यवाद रलह।
कार्यक्रमके सञ्चालन लैङ्गिक हिंसा सम्बन्धी बीछ बीचम ज्ञान देति यकदम मजासे बुझाके कर्ल रलह।
