बेलाैरी, कञ्चनपुर -
लालझाडी गाउँपालिका आगामी आर्थिक वर्ष २०८२/८३ के लाग नीति तथा कार्यक्रम तथा बजेट पारित कर्ती १८औं गाउँसभा अधिवेशन ओराइल बा।
गाउँपालिका अध्यक्ष तथा सभाध्यक्ष निर्मल राना अध्यक्षताम सोमबार ओराइल अधिवेशन आय–व्ययके विवरणसहित विनियोजन विधेयक व आर्थिक विधेयक पारित करल रह।
सभासे बजेट तथा कार्यक्रमहन सर्वसम्मत रूपम अनुमोदन कर्ल रलह। उपाध्यक्ष सपना चौधरी गाउँसभाम प्रस्तुत करल रलक बजेट अनुसार लालझाडी गाउँपालिकाके आगामी आर्थिक वर्षक लाग कूल बजेट ४३ करोड ६५ लाख २२ हजार रुपैयाँ रहल बा।
उक्त बजेटमसे २३ करोड ९९ लाख २६ हजार चालू खर्चतर्फ विनियोजन करल बा कलसे १९ करोड ६५ लाख ९६ हजार पूँजीगत खर्चक लाग छुट्याइल बा।
चालू खर्च प्रशासनिक सञ्चालन, तलब–भत्ता, कार्यक्रम व्यवस्थापन, सेवा प्रवाह व नियमित खर्च समेट्के बटाइल बा कलसे पूँजीगत बजेटसे पूर्वाधार विकास, सामाजिक सेवा, कृषि, शिक्षा, स्वास्थ्य, खानेपानी, सडक निर्माणलगायतके क्षेत्रहन प्राथमिकताम धर्ना उल्लेख करल बा ।
गाउँपालिकाम हाल जम्मा ६ वटा वडा रहल बा । वडागत बजेट विवरण अनुसार, वडा नं. १ के लाग ५० लाख २२ हजार, वडा नं. २ म ३४ लाख ७१ हजार, वडा नं. ३ म ३६ लाख २१ हजार, वडा नं. ४ म ५० लाख ३१ हजार, वडा नं. ५ म ३४ लाख ३४ हजार र वडा नं. ६ के लाग ३२ लाख ७३ हजार विनियोजन करल बा। असिक वडागत रूपम जम्मा २ करोड ३८ लाख ५२ हजार रुपैयाँके बजेट विनियोजन हुइल बा ।
गाउँसभामा छलफलक क्रमम जनप्रतिनिधिहुक्र कृषिम यान्त्रीकरण, विपद् व्यवस्थापन, शिक्षा क्षेत्रम गुणस्तर अभिवृद्धि, सडक मर्मत–संभार, स्वास्थ्य सेवाम पहुँच, रोजगारी सिर्जना तथा महिला, बालबालिका, अपाङ्गता हुइलक मनैनक लाग लक्षित कार्यक्रम थप प्रभावकारी बनैना आग्रह करल रलह ।
गाउँपालिका अध्यक्ष राना चालु वर्षक अधुरा योजनाहन प्राथमिकता देना व समावेशी विकासहन आघ बढिना प्रतिबद्धता व्यक्त क्रल रलह । उ कल, विकास योजनाम पारदर्शिता, जवाफदेहिता व जनसहभागिताके सिद्धान्तअनुसार हम्र नीति तथा कार्यक्रम तय क्रल बाटी।
अध्यक्ष राना सहित सुदूरपश्चिम प्रदेश कृषि मन्त्री वीरबहादुर थापा संयुक्त उद्घाटन क्रल रहल अधिवेशनम स्थानीय जनप्रतिनिधि, कर्मचारी, नागरिक समाज, पत्रकार एवम् सराेकारवालाहुकनके सहभागीता रहल गाउँ पालिकाके प्रमुख प्रशासकीय अधिकृत राजबहादुर सार्की बटील । उ कल - सक्कुनके साथ व सहयोग गाउँ अधिवेशन ओराइल रह।, १८औं अधिवेशनके अवसरम स्थानीय स्वास्थ्यकर्मीहुकन सम्मान समेत क्रगिल रह।
