बेलौरी, कञ्चनपुर –
‘धानवालीम सधैना : खाद्य सुरक्षा व आत्मनिर्भरता’ कना नाराके संग देशभर मनाईत २२औं राष्ट्रिय धान दिवस आइतबार कञ्चनपुरके बेलौरी नगरपालिका फेन भव्य रूपम ओराइल रह।
बेलौरी–५ मैनाहाम आयोजित कार्यक्रमम नगर प्रमुख, उपप्रमुख, प्रशासकीय अधिकृत, वडाध्यक्ष से स्थानीय कृषकहुकनके ढिउर से ढिउर सहभागीता रलह।
“औपचारिक कार्यक्रम पश्चात् सहभागीहुक्र खेत्वम धान लगैती २२औं राष्ट्रिय धान दिवसहन कृषिम व्यवहारिक सहभागिताके नमूना प्रस्तुत करल रलह कृषि प्राविधिक हरिश सेटीले कल,–“कार्यक्रम भव्य व सभ्य रुपम ओराइल रह ।”
कार्यक्रमके शुभारम्भमा कृषि प्राविधिक सुशीला बोहरा स्वागत मन्तव्य देती धान दिवसके महत्त्व, उद्देश्य व स्थानीय सरकारके सहकार्यम आधारित कृषिप्रतिके सक्रियताके आवश्यकता हो कना बटाइल रलह।
कृषि विकास शाखा प्रमुख सुमनराज जोशीके सभापतित्वम ओरिलक कार्यक्रमम नगर प्रमुख पोतीलाल चौधरी प्रमुख आतिथ्यताम रहल रलह ।
कलसे, उपप्रमुख जोगराम चौधरी विशिष्ट, प्रमुख प्रशासकीय अधिकृत गणेशसिंह ऐरी विशेष अतिथि तथा नगरके वडाध्यक्ष, कृषक समूहके प्रतिनिधि एवम् स्थानीय सराेकारवालाहुकनके उपस्थिति फेन रह।
कार्यक्रमहन सम्बोधन कर्ती नगर प्रमुख चौधरी कल, “धान हमार अस्तित्व व पहिचान हो। कृषिम आत्मनिर्भर निहुइतसम समृद्ध राष्ट्रके कल्पना कर निसेक्जाइ । बेलौरी नगरपालिका कृषकहन मल, बीउ, प्रविधि, तालिम, सिँचाइ व बजारके पहुँच उपलब्ध करैती कृषिम आधुनिकीकरण व व्यवसायीकरणके दिशाम काम कर्ती रहल बाट।”हम्र हरेक वर्ष कृषिके लाग सुदूरपश्चिमम सक्कुनसे ढीउर बजेट विनियोजन कर्ती मजा उपलब्धि समेत हासिल कर्ल बाटी।"
उ थप्ल- “हम्र कृषिम मजा काम कर्लक ओहरसे कृषि विकास शाखा प्रमुख सुमन राज जाेशी सुदूरपश्चिम प्रदेश सरकारसे सम्मानित समेत हुइल रलह।
नगर उपप्रमुख जोगराम चौधरी कृषकके श्रमहन सम्मान कर्ती कल, “स्थानीय सरकार कृषकसँग सहकार्य कर्ती समस्या पहिचान व समाधानम प्रतिबद्धता जनासेकल बाट। युवाहुकन कृषि ओहर आकर्षण करिना वातावरण बनैना हम्र योजनाबद्ध रूपम अघि बहड्ती बाटी।”
प्रमुख प्रशासकीय अधिकृत गणेशसिंह ऐरी कल, “बेलौरी नगरपालिका कृषिम बजेट, नीति, अनुदान व तालिममार्फत सेवा प्रवाह कर्ती आएल बा। कृषि उत्पादनम विविधिकरण व प्रविधिकरण आवश्यक बा व वाकर लाग स्थानीय सरकार पूर्ण रूपम तयार बा।”
वडाध्यक्षहुकनके ओहरसे बोल्ती बेलौरी नगरपालिका–७ के वडाध्यक्ष प्रकाश श्रेष्ठ, “हमार गाउँशहर ओर फेन कृषिम निर्भर बा। स्थानीय सरकार, प्राविधिक व कृषकके सहकार्यसे केल हम्र खाद्य आत्मनिर्भरता हासिल कर सेक्जाइ। यी दिवससे हमहन कृषकके योगदानप्रति सम्मान प्रकट कर्ना व हुकनहन प्रविधिम जोड्ना उत्प्रेरणा देहल बा।”उ वडास्तरम कृषि अनुदान तथा तालिम कार्यक्रम प्रभावकारी रूपम सञ्चालन कर्ना आवश्यक रहल बटिल।
सभापति जोशी कल, “धान दिवस केवल उत्सव निहो, कृषकके योगदानप्रतिके सम्मान व कृषि विकासम जनचेतनाके माध्यम हो। वैज्ञानिक विधि, समयम सेवा व सहजीकरणमार्फत केल हम्र खाद्य सुरक्षाम आत्मनिर्भर बन सेक्बी।”
बेलाैरी नगरप्रमुख चौधरीके नेतृत्वम सक्कु अतिथि तथा सहभागी टोली मैनाहथ्य खेत्वम धान लगाइबेर कृषकप्रति ऐक्यबद्धता प्रदर्शन करल रलह। खेत्वक हिल्लम हात दर्ती जनप्रतिनिधि, कर्मचारी व प्राविधिकहुक्र कृषिम सरकारके संलग्नताहन व्यवहारम देखाईल बाट।कार्यक्रमम विभिन्न वडासे ऐलक कृषकहुकनबीच अनुभव आदानप्रदान समेत कर्गिलक आयाेजक चौधरीखबरहन जनाईल रलह।
समयम मल, बीउ व तालिम पाक सेक्क उत्पादनम सुधार ऐलक सहभागी कृषकहुक्र बताइल रलह । तर, सिँचाइ, भण्डारण व बजारके समस्या ओर समाधान हुइना बाँकी रहल हुकनके कहाई बाटिन।
कार्यक्रमके अन्त्यम नगरप्रमुख चौधरी सहभागी सक्कुजहन व्यक्तिहुकनप्रति धन्यवाद ज्ञापन कर्ती कल, “स्थानीय सरकार, कृषक व प्रविधिबीचके समन्वयसे केल दिगो कृषि व खाद्य आत्मनिर्भरता सम्भव हुइ। धान दिवस हमिन वह प्रेरणा देहत।”
बेलौरी नगरपालिका यी वर्षके धान दिवसहन केवल औपचारिकताम सीमित निधैक व्यवहारिक सहभागिता मार्फत कृषिप्रतिके सम्मान व प्रतिबद्धता दुनु प्रस्तुत कर्ती कृषि विकासके दिशाम नवीन सन्देश देहल देखाइत।
