देशभरके गन्ना उत्पादक किसानहुक्र आन्दोलनके तयारीम बाट। संघीय सरकार चिनी उद्योगम गन्ना बेच्लक किसानहुकन देना कलक अनुदान बापतके बाँकी रकम भुक्तानी निकर्लक व समयम समर्थन मूल्य नितोक्लक ओहरसे नेपाल गन्ना उत्पादक महासङ्घके आह्वानम देशभरके गन्ना उत्पादक किसानहुक्र आन्दोलनके तयारीम हुइल बाट।
येहिनसे आघ नेपाल सरकार कृषि तथा पशुपन्छी विकास मन्त्रालय, उद्योगी तथा किसानबीच बारम्बार वार्ता हुइलसे फेन कार्यान्वयन निहुइलक कती महासङ्घ पुनः आन्दोलन आह्वान कर्ल बा।
गन्ना उत्पादक किसानहुक्र यह मङ्सिर १३ गतेभित्र गन्नाके न्यूनतम समर्थन मूल्य तोक्ना व गत आर्थिक वर्ष २०८१।०८२ के बाँकी अनुदान रकम भुक्तानी कर्ना यीहिनसेआघ नै सरकारहन चेतावनी सहित ज्ञापन पत्र बुझाइल रलह।
सरकारहन हालसम्म कौनो फेन प्रतिक्रिया निदेलक ओहरसे आब किसानहुक्र यह मङ्सिर १४ गते सर्लाहीके हरिवनम जम्मा होक पहिलो दिन एक घण्टा पूर्वपश्चिम राजमार्ग बन्द कर्ना व ओकर पाछ भोलिपल्ट यह मङ्सिर १५ गतेसे अनिश्चितकालीन राजमार्ग बन्दसहित विरोध प्रदर्शन कर्ना कार्य तालिका रहलक गन्ना उत्पादक किसान हकहित संरक्षण समिति कञ्चनपुरके अध्यक्ष हरि चन्द ठकुरीके भनाइ बटिन।
बिहीबार कञ्चनपुरके बेलौरीम बैथ्लक गन्ना किसानहुकनके बैठकसे चालु आर्थिक वर्षम गन्नाके न्यूनतम समर्थन मूल्य प्रति क्विन्टल ७ सय ५० रुपैयाँ हुइपर्ना माग आघ बढाइल। याकर संग संग सरकार गत वर्षके बाँकी अनुदान भुक्तानी करपर्ना व नयाँ अनुदान कम्तीम फेन प्रति क्विन्टल ७० रुपैयाँके दरसे देहपर्ना दबाब सिर्जना कर्ना सहमति हुइल रलहन। हुक्र चिनी उद्योग सञ्चालन हुइनासे आघ नै मूल्य तोवाक पर्नाम जोड देहल रलह। मूल्य नि तोवाकत सम कन्ना निकत्ना सक्कु किसानहुकन गन्ना उत्पादक किसान हकहित संरक्षण समिति कञ्चनपुर अनुरोध कर्ल बा।
