बेलौरी नगरपालिका –७ वडा खेलकुद समितिके आयोजनाम सञ्चालित रात्रिकालीन पुरुष भेट्रान भलिबल प्रतियोगिता शनिबार ओराइल बा।
विहिबार,स्थानीय स्तरम खेलकुदके विकास, अनुभवी भेट्रान खेलाडीहुकनके पुनः सक्रियता तथा आपसी सद्भाव अभिवृद्धि कर्ना उद्देश्यके आयोजना कर्गिलक प्रतियोगिता भव्यताके साथ ओराइल रह।
जम्मा १२ टिमके सहभागिता रहल प्रतियोगिताम आयोजक “A” उत्कृष्ट समन्वय व आक्रामक खेल प्रदर्शन कर्ती लगातार दुई सेट जित्ना हात पारल रह।
‘बेस्ट अफ थ्री’ प्रणालीम ओरिलक प्रतिस्पर्धाम धनगढी उपमहानगरपालिका–१२ के टिम कडा प्रतिस्पर्धा कैक फेन उपविजेताम सीमित हुइल रलह।
अस्तकह,आयोजक “B” टिमहन पराजित कर्ती भीमदत्त नगरके भेट्रान टिम तृतीय स्थान हासिल कर्क आयोजक चौधरीखबरहन जानकारी कराइल रलह।
प्रतियोगिताम विजेता टिमहन २५ हजार, उपविजेताले १५ हजार व तृतीय हुइना टिमहुकन ७ हजार नगदसहित ट्रफी, मेडल तथा प्रमाणपत्र प्रदान कर्ल रलह।
खेलप्रेमी शिक्षक तेजबहादुर चन्दके अनुसार प्रतियोगिता स्थानीय स्तरम खेलकुदप्रति आकर्षण बढाइक लाग महत्वपूर्ण भूमिका खेल्लक बटैल।
रात्रिकालीन समयम आयोजना कर्गिलक प्रतियोगिताम फेन दर्शकहुकनके धिउरसे दिउर उपस्थिति रहल रह। खेल अवलोकन कर्लक दर्शकहुक्र प्रतियोगिता अत्यन्त रोचक, अनुशासित व सौहार्दपूर्ण वातावरणम ओरिलक प्रतिक्रिया देहल बाट।
कार्यक्रमके प्रमुख अतिथि सुदूरपश्चिम प्रदेशसभा सदस्य दिवान सिंह विष्ट विजेता तथा सहभागी सक्कुजहन बधाई तथा शुभकामना व्यक्त कर्ती आयोजकके प्रशंसा कर्ल।
उ वडा अध्यक्ष प्रकाश श्रेष्ठके नेतृत्वम वडाम निरन्तर खेलकुद गतिविधि सञ्चालन हुइतीरहल उल्लेख कर्ती यीहिनसे युवाम सकारात्मक ऊर्जा विकास कर्नाके सङ सङ सामाजिक एकता सुदृढ कर्ना टेवा पुग्ना बतैल।
कार्यक्रमके विशिष्ट अतिथि प्रेम सिंह बोहरा असिन प्रतियोगिता स्थानीय स्तरम खेलकुद संस्कृतिके विकास व युवाहन स्वस्थ प्रतिस्पर्धातर्फ प्रेरित कर्ना विश्वास व्यक्त कर्ल।
अस्तकह,बेलौरी नगर खेलकुद समितिके अध्यक्ष रामेश्वर न्यौपाने खेलकुद क्षेत्रके दिगो विकासके लाग स्थानीय तह, क्लब व समुदायबीच सहकार्य आवश्यक रहलक कत्रे आगामी दिनम ओर व्यवस्थित व स्तरिय प्रतियोगिता आयोजना कर्ना जनैल बाट।
वडा अध्यक्ष प्रकाश श्रेष्ठ विगत चार वर्षदेखि निरन्तर आयोजना हुँइती ऐलक रात्रिकालीन पुरुष भेट्रान भलिबल प्रतियोगिताम प्रत्यक्ष तथा अप्रत्यक्ष रूपम सहयोग कर्नाहुक्र सम्पूर्ण सहयोगी, शुभेच्छुक तथा खेलप्रेमीहुकन धन्यवाद व्यक्त कर्ती आगामी दिनम फेन असिन खेलकुद गतिविधिहन ओर प्रभावकारी व व्यापक बनिती लैजिना विश्वास व्यक्त कर्ल बाट ।
फरक प्रसंगम खेलप्रेमी शिक्षक तेजबहादुर चन्द दुर–दुरसे आक प्रतियोगिताम सहभागी भई आयोजकहुकन माया, साथ व हौसला प्रदान कर्नव सम्पूर्ण शुभेच्छुक तथा शुभचिन्तकप्रति हार्दिक आभार व्यक्त कर्ल।
कार्यक्रममा विभिन्न वडाके जनप्रतिनिधि, सामाजिक अगुवा, खेलाडी तथा खेलप्रेमी दर्शकहुकन उल्लेख्य उपस्थिति रहल रह।
प्रतियोगिता स्थानीय स्तरम खेलकुदप्रति आकर्षण बधैनाके साथै आपसी सद्भाव, सहकार्य व एकता सुदृढ कर्न महत्वपूर्ण योगदान पुग्ना आयोजक बताइल रह।
