कैलालीको गोदावरी नगरपालिकास्थित मजगाउँमा माघ महोत्सव आयोजना हुने भएको छ ।
थारू समुदायको हराउँदै गएको लोककला, रीति संस्कृति संरक्षण सम्वर्धन गर्ने तथा पहिचान बचाउने उद्देश्यले माघ महोत्सव आयोजना गर्न लागिएको हो । थारू कल्याणकारिणी सभा गोदावरी नगर समिति, बरघर भलमन्सा नगर समिति, मजगाउँ थारू सामुदायिक होमस्टे र न्यू खुटिया चारपाटे युवा क्लबको सहकार्यमा महोत्सव आयोजना गर्ने बिहीबार पत्रकार सम्मेलन गरी जानकारी दिइएको छ ।
माघ १२ देखि १४ गतेसम्म आयोजना हुने महोत्सवको सुदूरपश्चिम प्रदेशका मुख्यमन्त्री कमलबहादुर शाहले उद्घाटन गर्ने आयोजकले जानकारी दिएको छ ।
महोत्सवमा थारू खानपान, थारू कला संस्कृतिको जगेर्ना सम्बन्धी विविध कार्यक्रम, पिङ, चर्खा तथा अन्य रमाइलो मेला मुख्य आकर्षण रहने थारू कल्याणकारिणी सभा गोदावरी नगर अध्यक्ष जनकलाल चौधरीले बताउनुभयो । “थारू समुदायको पहिचानसँग जोडिएका लोककला, रीतिसंस्कृति, गीतबास, रीतिरिवाज, चालचलन, बोलीभाषा, लवाईखवाई दिनप्रति दिन हराउँदै गइरहेको छ । त्यसलाई संरक्षण सम्वर्धनका लागि महोत्सव आयोजना गर्न लागेका हौं”, उहाँले भन्नुभयो ।
महोत्सवमार्फत सो क्षेत्रको कृषि पर्यटनलाईसमेत उजागर गर्ने थारू कल्याणकारिणी सभा कैलालीका पूर्व उपसभापति माधव चौधरीले बताउनुभयो ।
दिनेश चौधरी
