कञ्चनपुरके बेलौरी नगरपालिकाम रहल नेवाः देय् दबू बेलौरी नगर कार्य समितिके आयोजनाम तथा बेलौरी नगरपालिकाके प्रर्वद्धनम “भाषा संस्कृति सम्पदा पुर्खाया पौरख नेपाल संवत राष्ट्रिय गौरव”कना मूल नाराके साथ नेपाल संवत ११४६ के पूर्व संध्याम शनिबार बेलौरी नगरपालिकाके टेडिया स्थित भैरवदेव परिसरमम शुभकामना आदान प्रदान कार्यक्रम ओराईल रह।
कार्यक्रमके सभापतित्व नेवाः देय् दबू बेलौरी नगर कार्य समितिके अध्यक्ष सुरज श्रेष्ठ, बर्का पहुना बेलौरी नगरपालिकाकाके नगर प्रमुख पोतिलाल चौधरी, खास पहुना बेलौरी नगरपालिकाके नगर उप प्रमुख जोगराम चौधरी, नेवाः दबू केन्द्रिय कार्य समिति सदस्य पुनम श्रेष्ठ, नेवाः देय् दबू कञ्चनपुर जिल्ला कार्य समितिके अध्यक्ष प्रकाश श्रेष्ठ, नेवाः देय् दबू सुदुर पश्चिम कार्य समितिके सचिव भीम श्रेष्ठ,पहुनाहुक्र आदिवासी जनजाति नगर समन्वय परिषद् बेलौरीके अध्यक्ष कृष्ण गम्वा,नेवाः देय् दबू पुनर्वास नगर कार्य समितिके अध्यक्ष तिल कुमार श्रेष्ठ, नेवाः देय् दबू सुदुर पश्चिम कार्य समितिके निवर्तमान उपाध्यक्ष विजया लक्ष्मी श्रेष्ठ लगायत स्थानिय सञ्चारकर्मीके सहभागिता रह।
नेपाल संवत ११४६ के अवसरम शुभकामना मन्तव्य धर्ती नेवाः देय् दबू कञ्चनपुरके जिल्ला अध्यक्ष प्रकाश श्रेष्ठ नेपाल संवत हमार गौरव, पहिचान व अस्तित्वसे जोवाडल ऐतिहासिक संवत हो। यी संवतके संस्थापक संखुवाधर शाक्य सत्य, श्रम व इमानदारीके बलम समाजहन न्याय व मानवताके मार्गम आघ बहड्ना प्रेरित क्रर्लक बटैती सुदुरपश्चिम प्रदेश सरकारके सहयोगम यी वर्ष मन्दिर परिसरमम घेराबार निर्माण व संखुवाधर शाक्यके मूर्ति स्थापना क्रर्ना तयारी हुईलक फेन जानकारी देहल रलह।
कार्यक्रमम बोल्ती बेलौरी नगरपालिकाके उपप्रमुख जोगराम चौधरी सक्कु धर्म व संस्कृतिहन सम्मानके साथ आघ बहड्ना नगरपालिकाके नीति रहल बटैती सीमित बजेटके कारण पर्याप्त रकम विनियोजन कर नि सेक्लसे फेन संरक्षणम नगरपालिकाके साथ रहना बताईल रलह।
कार्यक्रमम बोल्ती बेलौरी नगरपालिका नगर प्रमुख पोतीलाल चौधरी नेपाल विविध जातजाति व संस्कृतिके साझा फूलबारी हुईलक बटैती संस्कृति संरक्षणके लाग क्रर्ना हरेक प्रयासम नगरपालिकाके सहयोग निरन्तर रना प्रतिबद्धता व्यक्त क्रर्ल रलह।
कार्यक्रमके समापनम नेवाः देय् दबू बेलौरी नगर कार्य समितिके अध्यक्ष सुरज श्रेष्ठल उपस्थित सक्कु पहुनाहुकन धन्यवाद देती नेपाल संवत भाइचाराके सन्देश दिना बताईल रलह।
कार्यक्रम नेवारी पहिचान झल्कना सांस्कृतिक कार्यक्रमके संग नेवारी खानपिन समेत क्रर्ल रलह। कार्यक्रमके सञ्चालन मिरा श्रेष्ठ क्रर्ल रलही।
