बेलौरी नगरपालिका ५ मैनाहम रत्गैया परिवार समाजके पच्वाँ राष्ट्रिय रत्गैया गोत्यार सम्मेलन ओराईल बा ।
सनिवार बेलौरी नगरपालिका ५ मैनाहम छोट्की दशीया व बरुवा पुजा रत्गैयनक पहिचान यी सँस्कृती हन सँरक्षण कर्ना हमार अभियानके साथ रत्गैया परिवार समाज केन्द्रीय समिति घोराही दाङ के आयोजनामे कार्यक्रम ओराईल रह ।
कार्यक्रमके सभापति केन्द्रीय रत्गैया समाजक अध्यक्ष पृथ्वी रत्गैया, बर्का पहुना सुदूरपश्चिम प्रदेशके योजना तथा भौतिक पुर्वाधार पूर्व राज्य मन्त्री चुन कुमारी रत्गैया, मन्ला पहुना बेलौरी नगरपालिकाके नगर उप - प्रमुख जोगराम चौधरी अस्तहके बहुत्त जिल्ला से रत्गैया परिवार हुकनके ढिउर से ढिउर सहभागी रलह ।
सुदूरपश्चिम प्रदेश योजना तथा भौतिक पुर्वाधार पूर्व राज्य मन्त्री चुन कुमारीके अनुसार रत्गैया परिवार गोत्यार सम्मेलन कैक केल नाही यक आपसम परिचय हुइना रत्गैया परिवार यकजुड होके हम्रे राजनीति हिसाबलेक फेन आघ बढ परत कना प्रतिबद्ध जाहेर कर्ल ।
कार्यक्रमके मन्ला पहुना बेपौरी नगरपालिकाके नगर उप - प्रमुख जोगराम चौधरीके अनुसार रत्गैया गोत्यार सम्मेलन कर्ना फे यकदम जरुरी बा ।यक आपसम परिचय कर्ना मौका फेन हो । यक आपसम सदभाव कायम ,समाजकेलाग कौनो व्यवसाय कैक हुइ कि शिक्षाके साथ साथम राजनीति वहर फेन रत्गैया परिवार यक जुड होक लाग पर्ना जरुरी बा ।
सभापतिके पृथ्वीके अनुसार हम्र ठाउँ ठाउँ जिल्लामे रत्गैया गोत्यार सम्मेलन कर्ती आईती हमार रत्गैयनके कुल घरधुरी २ हजार ९ सय १५ बा कल से जम्मा जनसंख्या १४ हजार ७ सय ८३ बाओइ पुरुषनके जनसंख्या ७ हजार २ सय ४० बाओइ कलसे महिलनके संख्या ७ हजार ६ सय ४८ रहल बा । अस्तक जेष्ठ नागरिक , एकल महिला हुकन फेन सम्मान करल रलह व राष्ट्रिय कलाकार हुकनके बेजोड प्रस्तुतिके साथ मोडल डान्सर हुकनके स्थानीय नाच गान होके भब्य ओर सभ्य रुपम सम्पन्न हुलक बटिल ।
कार्यक्रमके सञ्चालन रत्गैया परिवार समाजके केन्द्रीय महासचिव महेश रत्गैया करल रलह ।
दिनेश चौधरी
