कञ्चनपुरके बेलौरी नगरपालिका–७ स्थित गणेश मा.वि बरैयाम आयोजित तेस्रो नगरपालिका स्तरीय भेट्रान भलिबल प्रतियोगिता–२०८१ ओराइल बा।
तीन दिनसम्म सञ्चालन हुइलक (डे-नाइट) प्रतियोगिताम भीमदत्त नगरपालिका उत्कृष्ट प्रदर्शन कर्ती शनिबार आघ हुइल हो।
फाइनल खेलम आयोजक टोली 'B' ह पराजित कर्ती भीमदत्त नगरपालिकाह उपाधि जित्क, तृतीय स्थानके लाग हुइलक खेलम धनगढी उपमहानगरपालिका जित हासिल करल रह।
सुदूरपश्चिम प्रदेश सभा सदस्य एवम् पूर्व भाैतिक विकास मन्त्री प्रकाश बहादुर देउवा चैत २८ (बिहीबार) उद्धाटन क्रलक प्रतियोगिताके समापन कञ्चनपुर जिल्ला समन्वय प्रमुख दुर्गा बोहरा करल रलह।
पुरुष भेट्रान प्रतियोगिताम ७ टोलीके प्रतिस्पर्धा
वडा खेलकुद सञ्चालन समिति अध्यक्ष तेजबहादुर चन्दके अनुसार ४० वर्ष उप्पर पुरुष भेट्रान प्रतियोगिताम विभिन्न छिमेकी पालिकासहित कुल ७ टोली सहभागिता जनाइल रलह। उहाक अनुसार प्रतियोगिता भेट्रान खेलाडीहुकनके बीच आपसी समझदारी, मित्रता व सहकार्य अभिवृद्धि कर्ना के सङ खेलकुदप्रतिके लगाव बल्गर बनइना उद्देश्यलेक आयोजना क्रलक हो।
उ कल, “भेट्रान खेलाडीहुकन पुनः सक्रिय बनैती हुकनके अनुभवबसे युवापुस्ताहन प्रेरणा देना हमार उद्देश्य सफल हुइल बा। असिन प्रतियोगिता आगामी दिनम फे निरन्तर कर्ती लैइजिना प्रतिबद्धता लिहल बाटी ।”
नगदसहित ट्रफी, मेडल व प्रमाणपत्र
प्रतियोगिताम विजयी तीन टोलीहन नगद पुरस्कारसहित सम्मान करल बा। आघक स्थान हासिल कर्ना टोलीहन २५ हजार नगद, दोस्रोहन १५ हजार व तेस्रो स्थानहन ७ हजार नगदसहित ट्रफी, मेडल व प्रमाणपत्र प्रदान करल रलह।
विजेताहुकन जिल्ला समन्वय प्रमुख दुर्गा बोहरा, वडा अध्यक्ष प्रकाश श्रेष्ठ, बेलाैरी प्रहरी निरीक्षक भाष्कर चन्द, खेलकुद विकास समिति अध्यक्ष तेजबहादुर चन्दलगायत विशिष्ट अतिथिहुक्रा पुरस्कृत करल रलह।
स्थानीय सरकारके प्रतिबद्धता
कार्यक्रमके सभापति एवम् बेलौरी नगरपालिका वडा नं. ७ का अध्यक्ष प्रकाश श्रेष्ठ खेलकुदके माध्यमसे सामाजिक एकता व स्वास्थ्य सुदृढीकरणम टेवा पुग्ना बटैती असिन कार्यक्रमह ओर व्यवस्थित व व्यापक बनैना वडा कार्यालय प्रतिबद्ध रलक बटील।
“खेलकुद समुदायम अनुशासन, समर्पण व नेतृत्व विकास कर्था,” अध्यक्ष श्रेष्ठ कल, “हम्र आगामी दिनम ओर बहुत्त टोलीके सहभागिता हुइना कार्यक्रमके दायरा बरिना प्रयासम बाती।”सहभागी सक्कुजहन धन्यवाद ।
दर्शकके उत्साह व सहभागिता
प्रतियोगिता हेर बरैया व आसपासक क्षेत्रसे सयौं दर्शकहुकनके उपस्थिति रह। स्थानीय दर्शकहुकनके उत्साह, खेलाडीहुकनके जोश व आयोजक समितिके व्यवस्थापन प्रतियोगिताह विशेष बनिलक सहभागीहुक्र बटिथ।
समापन समारोहम अतिथिहुक्र खेलाडीहुकन प्रमाणपत्र व पुरस्कार बत्ना कर्ना के सङ आगामी दिनम खेलकुद गतिविधिम थप लगानी व सहभागिता आवश्यक रलकम जोड देल बाट ।
सहयोगीप्रति धन्यवाद
कार्यक्रम सफलतापूर्वक ओराइलक कर्ना सहयोग कर्ना सक्कुजहन आयोजक आभार व्यक्त करल बा। आयोजकहुकनके अनुसार, असिन प्रतियोगिताहुक्रा समुदायम सकारात्मक ऊर्जा फैलिना व खेलकुदके माध्यमसे सामाजिक परिवर्तनम योगदान पुग्ना विश्वास लेहल बाट ।
दिनेश चौधरी
