बेलौरी, कञ्चनपुर —
बेलौरी नगरपालिका पाछक समयम आयोजना कर्लक नि:शुल्क लोक सेवा तयारी कक्षा सफलतापूर्वक ओराइल बा।
खरिदार पदके आघक पत्र केन्द्रित यी तयारी कक्षा १६ चैत २०८१ से सञ्चालनम आइल रह। ६० जना से ढिउर स्थानीय युवा सहभागी रहल कक्षाके आइतबार ओराइल रह।
समारोहम नगरके उपप्रमुख, प्रवक्ता, प्रशासन अधिकृतसहित पालिकाके कर्मचारी, प्रशिक्षक व सहभागीहुकनक उत्साहजनक उपस्थिति रह। कार्यक्रमम बोल्ना वक्ताहुक्र असिन कार्यक्रम पालिकाके भविष्यप्रतिके लगानी हुइलक उल्लेख कर्ल ।
“शिक्षा आब घरम सुलभ” — उप–प्रमुख चौधरी
समापन समारोहके प्रमुख अतिथि बेलौरी नगर उप–प्रमुख जोगराम चौधरी कक्षा सफल रूपम ओरिलकम खुसी व्यक्त कर्ती असिन ऐतिहासिक प्रयाससे पालिकाके पहिचान बद्लना सहयोग पुग्लक बटिल।
“आब युवा पंक्तिहन काठमाडौं जाय निपर्ना अवस्था बनल,” उ कल, “हम्र गाउँम पढ्न, अभ्यास कर्ना व प्रतिस्पर्धा जित्ना वातावरण तयार करती ।”
उप–प्रमुख चौधरीके अनुसार, पालिकासे युवाहन लक्षित कर्ती आगामी वर्षम थप योजना लन्ना तयारी करती, जिहिमसे प्राविधिक तालीम, स्वरोजगार तालिम, करियर काउन्सेलिङ लगायतके पहल समावेश हुइना बा।
“यहाँके युवाम अपार सम्भावना बा” — प्रवक्ता भुल
कार्यक्रमके विशिष्ट अतिथि हर्कबहादुर भुल, नगर प्रवक्ताल कल, “युवाके आँखी आब अवसर खोज राजधानी निहोक, आपनै नगरतर्फ घुम लागल बट ।”
उ असिन कार्यक्रमसे केवल परीक्षा निहोक, आत्मबल निर्माणम फे योगदान देलक उल्लेख कर्ल।
“बेलौरीम असिन कार्यक्रम हुइना आपनम गर्वके विषय हो। आब हम्रओर सशक्त योजनासहित आघ बहड्बी,” भुल कल ।
“आजके कक्षा, कालके भविष्य” — अधिकृत ओझा
कार्यक्रमके सभापति तथा प्रशासन अधिकृत झपीराज ओझा तयारी कक्षा बेलौरी नगरपालिकाके दीर्घकालीन सोचके प्रतिबिम्ब हुइलक बटिल।
“हम्र देख्ल बटी — अवसर देक युवा कत्रा सक्षम बाट,” ओझा कल, “यह सोचसे हम्रहन असिन कार्यक्रमहन नियमित, फराकिलो व प्रविधियुक्त बनैना ऊर्जा दिहल बा।”
उ पालिकासे आगामी वर्षम सेवा आयोगक अतिरिक्त अन्य प्राविधिक क्षेत्रके परीक्षाक लाग समेत तयारी कक्षा सञ्चालन कर्ना योजना सार्वजनिक कर्ल।
सुदूरपश्चिम प्रदेशके एक उत्कृष्ट लाेक प्रशिक्षक समेत रहल ओझा सहभागी विद्यार्थीहुकन लाेक सेवा परीक्षाके लाग मेहनत व निरन्तरताके अभ्यासमा अभ्यस्त रहक लाग अनुरोध करल रलह।
डिजिटल माध्यम व दक्ष प्रशिक्षकके सहकार्य
तयारी कक्षाम सूचना प्रविधिके भरपूर प्रयोग क्रलक जनाइल बा । तालिका, पढाइ सामग्री, अभ्यास कागजात डिजिटल प्लेटफर्ममार्फत उपलब्ध करिल।
नेपाल सरकारक उपसचिव पर्शुराम पोखरेल, प्रशासन अधिकृत झपीराज ओझा लगायतके अनुभवी प्रशिक्षकहुकनके विद्यार्थीहुकन रणनीति, पाठ्यवस्तु व परीक्षा मनोविज्ञान सम्बन्धी प्रशिक्षण देहल रलह।
“सूचना प्रविधि बिना सम्भव नैहो” — कम्प्युटर अपरेटर पाण्डे
बेलौरी नगरके कम्प्युटर अपरेटर अशोक पाण्डे कक्षा सञ्चालनम सूचना प्रविधिके भूमिकाहन विशेष रूपम उल्लेख कर्ल।
“हम्र कक्षाके सम्पूर्ण व्यवस्थापन डिजिटल प्रणालीम आधारित बनाक पारदर्शिता, समय व्यवस्थापन व पहुँच सुनिश्चित क्रल बटी ,” उ कल।
उहाके अनुसार, सहभागीहुकन सामग्री, तालिका, अभ्यासपत्र व रेकर्डेड व्याख्यान समेत अनलाइनमार्फत उपलब्ध कराइल रलह।
“असिन प्रविधिमैत्री अभ्याससे गाउँम बैथक फे शहरसरह तयारी कर्ना सम्भावना देखाइल बा ,” पाण्डे थप्ल ।
सहभागी खुशी
सहभागीहुकनके अनुसार असिन कक्षासे हुकनम आत्मविश्वास व स्पष्टता लानल बा । सहभागी सुरिला चौधरी कल, “आब महिह पता बा — कुन किताब पध्ना कसिक तयारी क्रना।”
औंर सहभागी टेकराज पन्त थप्ल, “यी कक्षा हमार लाग अवसर व आशाके केन्द्रजसिन हुइल।”
‘क्यारियर हब’ के रुपम पालिका आघ बहर्ती : मेयर चाैधरी
बेलौरी नगरपालिकासे ओराइल कार्यक्रम मार्फत एक संकेत देहल बा — लोक सेवा तयारी केल नि होक , आब युवा लक्षित विविध सीपमूलक कार्यक्रम समेत पालिकासे सञ्चालन हुइना बेलाैरी नगरप्रमुख पाेतीलाल चाैधरी बटिल।
उ युवाहुकन शिक्षा व सीपयुक्त बनैती,भविष्य निर्माण कर्ना स्थानीय ‘क्यारियर हब’के रूपम पालिका आघबहड्ती जाइ कना जनाइल बाट । ,
दिनेश चौधरी
