विद्यालय स्तरकके खेलाडीहुकनके प्रतिभा उजागर कर्ना उद्देश्यसहित बेलौरीम आयोजित विद्यालय स्तरीय मेयर कप टी–२० क्रिकेट प्रतियोगिता ओराइल बा।
नगर खेलकुद समिति बेलौरीके आयोजनाम सञ्चालन हुइलक प्रतियोगिताके उपाधि वात्सल्य विद्या निकेतन जित्ती नगरके खेलकुद इतिहासम महत्वपूर्ण उपलब्धि थप्लक हो।
फाइनल खेलम वात्सल्य विद्या निकेतन सिद्धबाबा एकेडमी बेलौरीहन १० विकेटके फराकिलो अन्तरसे पराजित कर्लक आयोजक चौधरीखबरहन जानकारी देहल रलह।
टस जित्क पहिलक ब्याटिङ रोजल सिद्धबाबा एकेडमीके सुरुवातसे नै विकेट पतन जारी हिलक टोली वात्सल्यके बलरहुकनके कडा दबाब सामना कर्ना निस्यकल व केवल १० ओभरम ३० रनम समेटिन पुग्ल।
सामान्य लक्ष्य पाछ पारक लाग मैदानम उत्रलक वात्सल्य विद्या निकेतनसे कौनो फेन विकेट निगुमाक सहज रूपम लक्ष्य पूरा कर्ती उपाधि हात पर्लक हो। खेलभर वात्सल्यके खेलाडीहुकनके संयमित ब्याटिङ, अनुशासित प्रदर्शन व बलिङ आक्रमण प्रशंसनीय देखापरल रह।
नगर खेलकुद समिति अध्यक्ष रामेश्वर न्यौपानेके सभापतित्वम ओतिलक कार्यक्रमम बेलौरी नगरपालिकाके नगर प्रमुख पोतीलाल चौधरी प्रमुख आतिथ्यता रहल रलह।
समापन समारोहन सम्बोधन कर्ती नगर प्रमुख चौधरी खेलकुदसे विद्यार्थीहुकनके शारीरिक विकास केल नि होक मानसिक क्षमता, अनुशासन व नेतृत्व विकासम समेत भारी योगदान देना बताइल रलह।
मेयर विद्यालय तहसे नै असिन प्रतियोगिताहन सञ्चालन कर सेक्लसे भविष्यम बेलौरीसे राष्ट्रिय तथा अन्तर्राष्ट्रिय खेलाडी उत्पादन कर सम्भव हुइना विश्वास व्यक्त कर्ल रलह।
नगर खेलकुद समिति बेलौरीके अध्यक्ष न्यौपाने प्रतियोगिता सफल बनाइक लाग सहयोग करुइया सक्कु विद्यालय, खेलाडी तथा शुभचिन्तकप्रति आभार व्यक्त कर्ल रलह।
प्रतियोगिताम विजेता वात्सल्य विद्या निकेतन नगद ३० हजार रुपैयाँ, ट्रफी, मेडल तथा प्रमाणपत्र प्राप्त कर्ल बा कलसे उपविजेता सिद्धबाबा एकेडमीले २० हजार रुपैयाँसहित ट्रफी व प्रमाणपत्र पैल बाट।
अस्तहक संयुक्त रूपम तेस्रो स्थान हासिल कर्लक विज्डम एकेडमी व लिटिल गार्डेन बोर्डिङ स्कुल जनही ५–५ हजार रुपैयाँ, ट्रफी व प्रमाणपत्र प्राप्त कर्ल बाट।
प्रतियोगिताके उत्कृष्ट खेलाडीहुकनके फेन विशेष सम्मान कैगिल बा। प्लेयर अफ द टुर्नामेन्ट तथा बेस्ट बलरके उपाधि वात्सल्य विद्या निकेतनके निरज सिंह कार्की प्राप्त कर्ल बाट, कलसे बेस्ट ब्याट्सम्यानके उपाधि सोही विद्यालयके निराजन थापाहन प्रदान कर्लक आयोजक जनाइल बा।
विजेता बन्क वात्सल्य विद्या निकेतनके प्रिन्सिपल लक्ष्मण सिंह दियाल विद्यार्थीहुकनके मेहनत व अनुशासनके कारण उपाधि जित सफल हुइलक बताइल रलह। उ कल, हमार विद्यार्थीहुक्र निरन्तर अभ्यास, लगनशीलता व टिमवर्कके उत्कृष्ट उदाहरण प्रस्तुत कर्ल बाट। विद्यालय पढाइसँग खेलकुदहन फेन समान प्राथमिकता देहल बा। असिन प्रतियोगितासे विद्यार्थीहुकनम आत्मविश्वास बढिना व भविष्यम मजा खेलाडी बन्ना प्रेरणा दिइ।”
प्रतियोगिताम बेलौरी नगरपालिका भित्र रहल सामुदायिक तथा संस्थागत कैक ९ वटा विद्यालय सहभागी हुइल रलह।
