कञ्चनपुर , थारुकल्यानकारीणी सभा कञ्चनपुरके आयोजनाम थारु भाषा ,कलास संस्कृती संरक्षण व प्रवर्द्धन अन्तरक्रिया कार्यक्रम ओराइल बा।
सोमबार , थारुकल्यानकारीणी सभा कञ्चनपुरके आयोजनाम व सामाजिक विकास कार्यालय कञ्चनपुरके सहयोगम थारु भाषा , कला संस्कृती संरक्षण व प्रवर्द्धन अन्तरक्रिया कार्यक्रम ओराइल रह ।
कार्यक्रमम थारुकल्याणकारीणी सभा कञ्चनपुरके सानु चौधरीके सभापतित्वम बर्का पहुना बेलौरीके नगरप्रमुख पोतीलाल चौधरी , मन्ला पहुना बेलौरीके उप-प्रमुख जोगराम चौधरी ,पुर्व उप-प्रमुख चित्र कुमारी चौधरी , जिउलाल चौधरी , गीता देवी डगौरा,प्रशिक्षक रोखर दहित,थारुकल्यानकारीणी सभा कञ्चनपुरके सचिव रेशम चौधरी अस्तकह माहाकाली बहुमुखी क्याम्पसके दिपक चौधरी , स्वयमसेविका,युवा सन्जालके लौन्दिन लओन्दनके ढेउर से ढिउर सहभागिता रह।
कार्यक्रमके सुरुसे लास्तसम प्रशिक्षक दिहुइया रोखर दहित सहभागीहुकन यकदम मजासे छलफल , अन्तरक्रिया कैक प्रशिक्षार्थीहुकन नि बुझल बाट फेन इस्पस्त रुपसे बुझाइल रलह।
बेलौरी नगर प्रमुख चौधरी कल, थारु भाषा ,कला संस्कृती हेरैती जाइता तब्बमार हामार थारु समाजफेन बहुतसे मजाचिज लुकल बा मजा चिझन संरक्षण कर्ना जरुरी हो काजे कि यदि हम्र जगेर्ना नि करब त पाछक पुस्ताहुक्र नि सिखही नै मजा समाजह खल्भलैना चिजहन छोर फेन पर्ना जरुरी बा अत्रकेल नि होक नगरपालिकासे करपर्ना सहयोग हमेसा हातोलालो कर्ती साथ सपोत रही।
उप-प्रमुख जोगराम चौधरी कल, थारुकल्यानकारीणी कना हमार थारु समाजहन आघ बधैना यक थो सस्था हो थारुनके हरेक भाष,कला,संस्कृती बचैनाम बहुत भारी भुमिका खेलत तब्ब मारसे थारुनके लवाइ खवाइ , रहन सहन , थारुनके मुद्दा उथिनासे लेक हरेक समय सयम कार्यक्रम कर्ती रहत तब्ब ओहरसे हम्र फेन बेलौरी नगरपालिकाम उप- प्रमुखके हिसाबले सक्दो साथ समर्थन रही कना प्रतिबद्ध जाहेर करल रलह।
सभापति कल, थारु समाज भाषा , रहन सहन, खानपिन , पुरान पुरान बनिलक, समान लोप हुइती जाइता तब्ब मारसे यिहिनहन जगेर्ना कर पर्ना जरुरी बा ।अत्रकेल नि होक आजकाल थारुनके लर्का फेन आपन भाषाफेन बोल बिस्राइ लागल बात तब्ब मारसे हम्र यकजुत होक हतेमालो कर्ती थारु भाष, कला संस्कृती संरक्षण व प्रवर्द्धन कर पर्ना यकदम जरुरी बा।
कार्यक्रमके सञ्चालन थारुकल्यानकारीणी सभा कञ्चनपुरके सचिव रेशम चौधरी करल रलह।
दिनेश चौधरी
