सुदूरपश्चिम प्रदेश सरकारहन बेलौरी नगरपालिका भलमन्सा समिति अट्वारी पर्वके सार्वजनिक विदाहन सच्चिना ध्यान आकर्षण कैक प्रेस विज्ञत्ती निकर्ल बाट।
सुदूरपश्चिम प्रदेश सरकार मन्त्रीपरिषद के मिति २०८१/१२/२१ के निर्णयानुसार २०८२ सालम हुइना पर्वहन सुदूरपश्चिम प्रदेशभित्तर सरकारी व सार्वजनिक निकायम सार्वजनिक विदा देना निर्णय कर्ल बा।
सुदूरपश्चिम प्रदेशभर सक्कु सरकारी कार्यालय व सार्वजनिक निकायम छुत्ती हुइना तिहवार,अट्वारी सावन २५ गते आइतबार , ओल्के पर्व भदौ १ गते आइतबार , गौरा पर्व भदौ १६ गते सोमबार , भुवा पर्व पुष ४ गते शुक्रबार , जिता मर्ना पर्व पुष ३० गते बुधबार ,खखडेहरा पर्व फागुन २६ गते मंगलवार सुदूरपश्चिम प्रदेश सरकार छुत्ती देहल बा।
अस्तहक बेलौरी नगरपालिका भलमन्सा समिति बेलौरी कञ्चनपुर थारु समुदायम मनैना अट्वारी पर्व भदौ ८ गते रहल ओहरसे जोन सुदूरपश्चिम प्रदेश सरकारके देहल सावन २५ गतेहन सच्याके खास रह पर्ना भदौ ८ गते आइतबार सार्वजनिक विदा हुइ परल कना जोरदार प्रदेश सरकारहन ध्यानाकर्षण कराइक लाग बेलौरी नगरपालिका भलमन्सा समिति प्रेस विज्ञत्ती निकर्ल बाट।
बेलौरी नगरपालिका भलमन्सा समितिके अध्यक्ष अमर सिंह चौधरी कल, जओन थारु समुदायम मनैना यकदमै अट्वारी पर्वम भदौ ८ गते हिइना थाउम प्रदेश सरकार सावन २५ गते हन सुधारक लाग सरकारहन ध्यान करिलक हो।
बेलौरी नगरपालिका भलमन्सा समितिके
युवा सदस्य किसन गम्वा कल, अटवारी पर्वके सार्वजनिक विदाहन सच्चिना यकदम जरुरी बा। कैक बताइल रलह ।
