कञ्चनपुर, कैलालीम बसोबास क्रना राना थारु समुदायम आइतबार तिज पर्व मनैती बाट। आज महिला दिदीबहिनीहुक्र दिनभर निराहार व्रत बैथक तिज पर्व मनाइ लागल बाट।
यी पर्वम दिनभर व्रत बैथक सन्झयाक लॾयम पूजाआजा कैक ओह प्रसादके रूपम तयार प्रलक परिकार खैना चलन बा। राना थारु समुदायके तिज ओर समुदायके तिजसे फरक रहत। महिलाहुक्र आपन दाजुभाइ, भतिजाके दीर्घायु कामना क्रती व्रत बैथना क्रथ।
नेपालम अन्य समुदायसे मनैना तिजके अवसरम महिनौँ दिनसम्म दर खैना क्रलसे फेन राना थारु समुदायके महिलाहुक्र दरबिनाके तिज मनैना क्रथ। राना थारु समुदाय तीजके दिन दिनभर निराहार व्रत बैथक अपराह्न वा सन्झयाके लॾयम जाक पूजा क्रना उ क्रमम सावनकी डोला बनैना प्रयोग क्रलक डोरी (मुरिया) काट्क लैजीना क्रथ। यह मारसे गरी, झुरकी (कुसके गाँठी) बनाक लैजीना चलन बा।
विवाहित व्रतालुसे सात थो गाँठी व अविवाहितसे पाँच थो गाँठी बनाक झुरकी लैजीना चलन बा। मुरिया व झुरकी दुनु लॾयम पुहिथ। सो क्रमम व्रतालुहुक्र झुरकी व मुरियाहन लॾयक धारम छोडक ‘धारै धार दुर जैना, हमार दाजुभाइ, भतिजाके उमेर बढैना’ कैक बेलौरी नगरपालिका ७ के भलमन्सा प्रताप राना चौधरीखबरहन जानकारी देहल रलह।
झुरकी लॾयम पुहक जत्रदुर जाइ दाजुभाइ, भतिजाके आयु वत्रहनै लाम्मा विश्वास रहल बा।तीजके पूजाआजापाछ व्रतालुसहित घरपरिवार सक्कु मिल्क सिमही, पुरी, गुलगुला, पकौडा, पपरा लगायतके मिठा परिकार खैना चलन रहल बा । अस्तहक, दाजुभाइहुक्र व्रतालुहुकन आशीर्वादके साथै सेकलसम दक्षिणा फेन देना क्रथ ।
