कञ्चनपुरके बेलौरी नगरपालिका वडा न ८ रामपुर खेलकुद क्लव आयोजना करल वडा स्तरीय तेस्रो वडा अध्यक्ष कप भलिबल प्रतियोगिता सुरु हुइल बा।
सोमबार , "स्वास्थ्यके लाग खेलकुद राष्ट्रके लाग खेलकुद" कना मुल नाराके साथ बेलौरी नगरपालिका वडा न ८ रामपुर श्री जन ज्योति माध्यमिक विद्यालयके प्राङ्गणम वडा स्तरीय तेस्रो वडा अध्यक्ष कप भलिबल प्रतियोगिताम वडा न ८ के आर्थिक सहयोगम २ दिन सम खेल हुइना ओर मंगलबार फाइनल ग्याम हुइना बा।
भलिबल प्रतियोगिताम रामपुर युवा क्लवके अध्यक्ष रनविर सिंह थापाके सभापतित्वम बर्का पहुना बेलौरी नगरपालिकाके नगर उप-प्रमुख जोगराम चौधरी , मन्ला पहुनाहुक्र वडा न ८ के वडा अध्यक्ष बिषराम राना , वडा न ९ के वडा अध्यक्ष किसन सिंह राना,वडा न ७ के वडा अध्यक्ष प्रकाश श्रेष्ठ अस्तहक सस्थापक अध्यक्ष अशोक कुमार पाण्डेय समाजसेवी किसन सिंह ऐरी, प्राचार्य टेकराज अवस्थी लगायत दर्शक हुकनके फेन ढिउर से ढिउर सहभागी हुइल रलह।
संस्थापक अध्यक्ष अशोक कुमार पाण्डेय कल" यी बेलौरी नगरपालिका वडा न ८ ठाउँम सक्कुन से आघ खेलाडीन उत्पादन मै करल रहु , खेल खेली स्वास्थ्य बचाइ कना सोचलेक आघ बिलकुल हो, तब मार स्वास्थ्य बाट त सब कुछ कर सेकजाई कना सन्देश देती सन्झयाके सोमबार तीज पर्वकेक्श्री जन ज्योत माध्यमिक विद्यालय मिलन नाच, गान हुइना जानकारी करल रलह।
भलिबल प्रतियोगिताम ९ थो टीम दर्ता हुइल रह,अस्तहक बिजेताहुकनके लाग पुरुस्कार प्रथम हुइयनके लाग १२ हजारके सङ ट्राफी दोस्रो हुइयनके लाग ८ हजारके सङ ट्राफीके व्यवस्था रहल बेलौरी नगरपालिकाके विपत व्यवस्थापन समितिके संयोजक अशोक कुमार पाण्डेय चौधरी खबरहन जानकारी देहल रलह।
नगर उप-प्रमुख जोगराम चौधरी कल" स्वास्थ्य मजा बनाइक लाग खेल खेल्ना यकदम आवस्यक बा काजे कि हमार जिवनम स्वास्थ्य नि मजा रही त कौनो फेन काम कर नि सेक्जाई कति असिन असिन कार्यक्रमम सद्दभर सहकार्य हतोमालो कर्ती हमार साथ सहयोग रही ओर नगरपालिकासे हुइना सहयोग फेन रही कति यह हरितालिका तीज पर्व ओर अट्वारी तिहुवारके सक्कु नेपालीहुकन शुभकामना देहल रलह।
वडा न ९ के अध्यक्ष किसन सिंह रानाके अनुसार यी तीजके अवसरम भलिबल प्रतियोगिता जौन ८ नम्बरके वडा स्तरीय तेस्रो वडा अध्यक्ष कप भलिबल धर्लक ओहरसे विशेष वडा कार्यालयहन धन्यबाद देहल रलह, अस्तहक हमार वडा न ९ म फेन लगतै १४ गते हुइना जानकारी देहल रलह।
भलिबल प्रतियोगिताम वडा न ७ के वडा अध्यक्ष प्रकाश श्रेष्ठ कल" असिन भलिबल खेलह फेन जोगाई पर्ना यकदम जरुरी बा, यदि हम्र खेलहन नि जगेर्ना नि करबते पाछ्क पुस्ताहुक्र सिख नि पही लोप हुइती जाई तब मारसे मै त आपन वडा म प्रत्यक वर्ष रातके लग्ना भेट्रान्स भलिबल प्रतियोगिता कार्यक्रम कर्थु असिन कार्यक्रमसे गाउँके जनता यकदम खुसी हुइलक बटिथ।
अस्तहक खेलहन खेलुइया प्रेम चन्द रलह कलसे सञ्चालन करुइया सचिव निरज विष्ट कर्ती मंगलबार हुइना खेल बिहानके ९ बजेसे हुइना जानकारी कराइल रलह।
