दिनेश चौधरी
२६ २०८२ शनिबार (७ महिना अघि)
पाठक संख्या ४३१
कञ्चनपुरके बेलौरी नगर भलमन्सा समितिके आयोजना व बेलौरी नगरपालिकाके आर्थिक सहयोगम "राष्ट्रिय एकता व विविधता हमार शान, थारू भाषा, संस्कृति बचैना हमार अभियान" कना मूल नाराके साथ बेलौरीके खुला मञ्चम माघ म्याला सुरु हुइल बा।
शनिबार, बेलौरीके खुला मञ्चम पौष २६ गतेसे २९ गतेसम सञ्चालन हुइना माघ म्याला २०८२ के पूर्व खानेपानी मन्त्री बिना मगर औपचारिक उद्घाटन कर्ल रलह।
कार्यक्रमके सभापति बेलौरी नगर भलमन्सा समितिके अध्यक्ष अमर चौधरी, बर्का पहुना पूर्व खानेपानी मन्त्री बिना मगर,खास पहुनाहुक्र संविधान सभा सदस्य एवं सुदूरपश्चिम प्रदेश सभा सदस्य दिवान सिंह बिष्ट, बेलौरी नगरपालिकाके नगर प्रमुख पोति लाल चौधरी, नगर उप प्रमुख जोगराम चौधरी,पहुनाम नगरपालिका नगर प्रवक्ता हर्क बहादुर भूल,थारु कल्याकारिणी सभा कञ्चनपुरके अध्यक्ष सुनिता चौधरी,बेलौरी नगरपालिकाका वडा नम्बर १ से १० समके वर्तमान एवं निर्वतमान वडाध्यक्ष, रामनगर सामुदायिक वन उपभोक्ता समितिके अध्यक्ष दीपा चौधरी,राजनीतिक दलके अध्यक्ष प्रतिनिधि,सुरक्षाकर्मी लगायतके उपस्थिति रह।
कार्यक्रमम बोल्ती नगर उप-प्रमुख जोगराम चौधरी माघ म्याला सँग सक्कु जातजातिके मौलिक सांस्कृतिक कार्यक्रम समेत्लक सामाजिक सद्भाव व एकता मजबुत हुइनाके साथै स्थानीय कला, संस्कृति व पहिचानके संरक्षण कर्ती पर्यटन प्रवर्द्धनम समेत मद्दत पुग्ना बताइल रलह।
कार्यक्रमके अवसरम रक्तदान सँग थारु समुदायके मौलिक कला, संस्कृति व पहिचानके संरक्षण व प्रवर्द्धन कर्ना उद्देश्य थारु परम्परागत खानाके परिकार, थारु समुदाय विगत प्रयोग कर्ती अइलक सामान प्रदर्शनी,सांस्कृतिक कार्यक्रमम सखिया, मघौटा, झुम्रा व रानाथारु समुदायके होरी नाच प्रस्तुत कर्गिल रह। कार्यक्रमम चर्चित गायक मनिराम चौधरी व लक्ष्मी रानाके बेजोड प्रस्तुति रह।
कार्यक्रमम बोल्ती बेलौरी नगरपालिकाके नगरप्रमुख पोतीलाल चौधरी अइती रहल माघ पर्वके शुभकामना व्यक्त कर्ती नगरभित्र बसोबास कर्ना सक्कु जातजातिके मौलिक संस्कृतिके संरक्षण व प्रवर्द्धनहन सद्दभर प्राथमिकताम धर्ती अइलक बटैती सामाजिक सद्भाव व सांस्कृतिक एकता मजबुत बनैना असिन कार्यक्रमहन आगामी दिनम फेन निरन्तरता देती आवश्यक सहयोग व सहकार्य कर्ती जैना प्रतिबद्धता जाहेर व्यक्त कर्ल रलह।
कार्यक्रमम बोल्ती खास पहुना, संविधान सभा सदस्य तथा सुदूरपश्चिम प्रदेश सभा सदस्य दिवान सिंह बिष्ट असिन सांस्कृतिक मेलासे समाजम आपसी सद्भाव बढैती विविधताम एकता कायम कर्ना सहयोग पुग्ना बताइल रलह।
कार्यक्रमके बर्का पहुना पूर्व खानेपानी मन्त्री बिना मगर माघ पर्व थारु व मगर समुदायके मौलिक पहिचान, संस्कृति व परम्पराके संरक्षण तथा प्रवर्द्धन कर्ना महत्वपूर्ण अवसर हुइलक बतैटी असिन पर्वसे सामाजिक एकता मजबुत बनैनाके साथ स्थानीय कला, संस्कृति व पर्यटन प्रवर्द्धनम मद्दत पुग्ना बताइल रलह। पूर्वमन्त्री मगर अप्प्ने मन्त्री हुइलक कंचनपुर क्षेत्र नम्बर १ खानेपानीके योजना सहित ढिउर विकास कर्लक दाबी कर्ल रलह।
कार्यक्रमके समापनम बोल्ती सभापति तथा बेलौरी नगर भलमन्सा समितिके अध्यक्ष अमर चौधरी माघ पर्व थारु समुदाय नयाँ वर्षके रूपम मनैना परम्परागत चलल हुइलक बताइल रलह। उ प्रत्येक वर्ष गाउँ–टोलम नयाँ भलमन्सा चयन कर्ना चलन रहलक व यी पर्वसे थारु समुदायके ऐतिहासिक संस्कार, जीवनशैली व सांस्कृतिक सम्पदाहन भावी पुस्तासम हस्तान्तरण कर्ना महत्वपूर्ण सहयोग पुगैना बताइल रलह।
कार्यक्रमके सहजीकरण बेलौरी नगर भलमन्सा समितिके सचिव विक्रम चौधरी यकदम सुघ्घुरसे कर्ल रलह।
