कञ्चनपुरके बेलोरी नगरपालिका वडा नम्बर ७ भगतपुरम वडा स्तरीय माघी मिलन सांस्कृतिक कार्यक्रम ओराइल बा।
शनिबार, बेलौरी नगरपालिका वडा नम्बर ७ भगतपुर वडा कार्यालयम वडा स्तरीय माघी मिलन सांस्कृतिक कार्यक्रम चौधरी समुदायके चाडपर्व भेषभुषा संस्कृति संरक्षण समितिके आयोजनाम " थारु एकता हमार शान, संस्कृति बचैना हमार अभियान" कना मुल नाराके साथ माघी मिलन सांस्कृतिक कार्यक्रम भव्य रुपसे ओराइल रह।
कार्यक्रमम बेलौरी नगरपालिका वडा नम्बर ७ के सन्तुराम चौधरीके सभापतित्वम बर्का पहुना बेलौरी नगर उप-प्रमुख जोगराम चौधरी,खास पहुनाहुक्र बेलौरी नगरपालिका वडा नम्बर ७ के वडा सदस्य कार्यवाहक कमान सिंह चौधरी, वडा सदस्य देशु चौधरी, वडा सदस्य तुलसी शर्मा, पहुनाहुक्र भलमन्सा बजारे चौधरी, रामलाल राना,पधनस अन्तराम राना,पतिराम चौधरी, समाजसेवी बुद्धिजीवी लाहानु चौधरी, लगायत भलमन्साहुकनके फेन ढिउर से ढिउर उपस्थिति रह।
नगर उप-प्रमुख जोगराम चौधरी कल" माघी पर्व परम्परागतसे चल्ती अइलक यक थो पर्व हो यी पर्वके उद्देश्य थारु समुदायके पहिचान,संरक्षण कर्ना व यक आपसम,सद्भाव एकता ओर सामाजिक मेल मिलाप हुइना थारु समुदायके बर्का पर्व हो।अस्तकह आपन जिवन नकरात्मक सोचविचार छोर्क सकारात्मक सोचके साथ आघ बहड्ना यकदम जरुरी बा। कति उपस्थित सक्कुजहन माघके शुभकामना फेन देहल रलह।
वडा सदस्य कार्यवाहक कमान सिंह चौधरीके अनुसार हमार वडाम विभिन्न जातजातिके मनै बती राना थारु, चौधरी,पहाडी समुदायके सक्कुनके चाड्पर्व अलग अलग किसिमके रलक ओहरसे सक्कुजहनके संस्कृति बचाइक्ला वडासे बजेड छुत्तिल रथी, हम्रे सक्कुजहन सम्मान रुपसे हातोमालो कर्ती आघ बढ्ल बती।अत्रकेल नि होक चौधरी समुदायके लाग लहेङा चोलिया तालिम राना जातिनके लाग फेन घघरिया अस्तहक बहुत वडासे तालिम देती आइती, आब्ब वडा अध्यक्ष प्रकाश श्रेष्ठ काठमाडौँ गैलक ओहरसे मोर तर्फसे सक्कु जनताहुकन माघीके शुभकामना संदेश सुना देहो कैक कार्यवाहक कमान सिंह चौधरी हन कल रलह।
कार्यक्रमके सभापति सन्तुराम चौधरी कल" हमार गाउँके भलमन्साहुकनके यकदम भारी भुमिका रथिन हमार थारु समुदायम नुकल कला,संस्कृति परम्परागतसे चल्ती आइल रिवाजहन बचाय पर्थ कना उद्देश्य आघ बढल रथ। काजे कलसे हमार पाछ अइना पिढीहुक्र पुरानचालचलन ना भुलत कना हिसाबसे सक्कुजन हातोमालो कर्ती आघ बढब त अवस्य कालिक दिनम फेन यिहिनसे मजा व भव्य कार्यक्रम हुइ कना विश्वास कर्ल बाटु।
कार्यक्रमके सञ्चालन करुइया शर्मिला चौधरी कलि" मघौता नाच, सखिया नाच, झुम्रा नाच, स्तेज डान्स स्थानिय कलाकारहुकनके बेजोड प्रस्तुति हुइनाके सँग सँग एकदम भव्यरुपसे सञ्चालन कर्ल रलही।
