राष्ट्रके लाग खेलकुद; स्वास्थ्यके लाग खेलकुद’ कना मूल नाराके साथ बेलौरी नगर खेलकुद समितिद्वारा आयोजित बेलौरी नगरपालिका विद्यालय स्तरीय मेयर कप T-20 क्रिकेट प्रतियोगिता सुरु हुइल बा।
कार्यक्रमम बेलौरी नगर खेलकुद समितिके अध्यक्ष रामेश्वर न्यौपानेके सभापतित्वम बर्का पहुना बेलौरी नगरपालिका नगरप्रमुख पोतीलाल चौधरी खास पहुना बेलौरी नगर उप-प्रमुख जोगराम चौधरी,पहुनाहुक्र बेलौरी नगर खेलकुद समितिके सदस्य तेजबहादुर चन्द, वात्सल्य विद्या निकेतनके प्रिन्सिपल लक्ष्मण सिंह दियाल, सुरेन्द्र बोहरा लगायत पत्रकारहुकनके फेन उपस्थिति रह।
उद्घाटन समारोहम बेलौरी नगरपालिकाके उप-प्रमुख जोगराम चौधरी विद्यार्थी तहसे नै खेलकुदके विकाससे स्वस्थ नागरिक उत्पादनम महत्वपूर्ण भूमिका खेल्ना बटाइल रलह।
नगर खेलकुद समितिके अध्यक्ष रामेश्वर न्यौपानेके अनुसार प्रतियोगिताम जम्मा ९ विद्यालयके सहभागिता रहल व प्रतियोगिता नकआउट प्रणालीम सञ्चालन हुइती रहल चौधरीखबरहन जानकारी देहल रलह।
प्रतियोगिताके आघक दिन सरस्वती माध्यमिक विद्यालय बुटावारी व जनज्योति माध्यमिक विद्यालय कलकत्ताबीच हुइलक खेलम जनज्योति मावि सरस्वती माविहन ९ विकेटसे पराजित कर्ल बा। उ खेलम उत्कृष्ट प्रदर्शन कर्ती ४ विकेट लेहल जनज्योति माविके मुकेश विक म्यान अफ द म्याच घोषित हुइल रलह।
आयोजकके अनुसार काल हुइनव खेलम आघक खेल बिहान्क १० बजे लिटिल गार्डन गोकुलपुर व लक्ष्मी माध्यमिक विद्यालय जब्दियाबीच हुइना बा कलसे दोस्रो खेल दिनक १ बजे महाकाली माध्यमिक विद्यालय विद्यानगर व विज्डम एकेडेमी रिछाहाबीच हुइना बा।
यहबीच, जिल्ला स्तरीय खेलकुदके लाग नगरपालिका भित्तरके क्रिकेट खेलाडीहुकनसे छनौट करपर्ना हुइलक ओहरसे यह माघ १२ गते खुल्ला मञ्चम उपस्थित होदेहो कना खेलाडीहुकन अध्यक्ष न्यौपाने अनुरोध कर्ल बाट।
